2022 წელს საქართველოდან ყურძნის ნატურალური ღვინის ექსპორტი შემცირდა. 7 თვის მონაცემებით, საექსპორტო ბაზრებზე 121 მლნ დოლარის ღვინო გავიდა, რაც 2.9%-ით ნაკლებია 2021 წლის ამავე პერიოდის მაჩვენებელზე. უმსხვილესი საექსპორტო ბაზარი ისევ რუსეთია, 72.2 მილიონი დოლარით რუსეთზე მთლიანი ექსპორტის 59.6% მოდის. მეორე ადგილზეა პოლონეთი - 8.6 მლნ. დოლარის შემოსავლით, ხოლო მესამეზე ჩინეთი 8 მილიონი დოლარით.
ღვინის ეროვნული სააგენტოს თავმჯდომარე ლევან მეხუზლა ამბობს, რომ 2027 წლისთვის რუსეთის წილი ღვინის ექსპორტში 20%-ით უნდა შემცირდეს.
„2027 წლისთვის რუსეთის წილი ღვინის ექსპორტში 20%-ით უნდა შევამციროთ და 40%-მდე ჩამოვიდეს. ბაზრების დივერსიფიცირებამ მოგვცა ის შედეგი რაც დღეს გვაქვს, მაგალითად მნიშვნელოვანი მატებაა ამერიკის მიმართულებით და სხვა სტრატეგიულ ბაზრებზეც ზრდა დაფიქსირდა, რის ხარჯზეც მოხდა უკრაინაში კლების გადაფარვა.
ექსპორტი დაახლოებით 60 ქვეყანაში გვაქვს და მათ შორის არის ქვეყნები, რომელიც ღვინისთვის ძალიან კარგი ბაზარია და ყველა ამ ქვეყანაში სტრატეგიულად ვმუშაობთ. ჩვენთვის საინტერესოა ასევე ქვეყნები, რომელიც რაოდენობის მხრივ თითქოს ნაკლებ საინტერესოა, თუმცა ისინი არიან მაღალ მსყიდველუნარიანი და დივერსიფიცირების კუთხით აუცილებელია მათი ათვისება, მათ შორის ჩრდილო ევროპა, სკანდინავია და ბენელუქსის ქვეყნები. შექმნილ ვითარებაში მსგავსი ბაზრები საინტერესოა. წელს ძალიან კარგი მარკეტინგული კომპანია გვყავს პარტნიორად და ვფიქრობ, უფრო თვალსაჩინო გახდება ამერიკის ბაზარზე ექსპორტის მატება.
ასევე მნიშვნელოვანია, რომ მთავრობის გეგმით 2025 წლისთვის აშშ-ს ბაზარზე ყოველწლიურად სტაბილურად 5 მლნ ბოთლი ქართული ღვინო უნდა გაიყიდოს“,— ამბობს მეხუზლა.
ლევან მეხუზლა „კომერსანტთან“ ამბობს, რომ მიმდინარე წელს მოსალოდნელი 8-10%-იანი ზრდის ნაცვლად შესაძლოა ღვინის ექსპორტი გასული წლის მაჩვენებელს გაუტოლდეს ან მცირედით ჩამორჩეს კიდეც.
აღსანიშნავია, რომ ღვინის უმსხვილესი საექსპორტო ბაზარი რუსეთის, პოლონეთის და ჩინეთის შემდეგ, ყაზახეთი 5.13 მლნ. დოლარით და უკრაინაა 4.9 მლნ დოლარით. 27.7%-იანი ზრდაა აშშ-ის ბაზარზე, საიდანაც ღვინის ექსპორტის შემოსავალმა 3.143 მლნ დოლარი შეადგინა. ამ ბაზარს სტრატეგიულ ბაზრად განიხილავენ საქართველოში და აღნიშნავენ, რომ 2025 წლისთვის სამიზნე მაჩვენებელია ამერიკის საექსპორტო ბაზარზე გაყიდვებმა 5 მილიონ ბოთლს მიაღწიოს.