პრეზიდენტ პუტინის ადმინისტრაციიდან გაჟონილი დოკუმენტების თანახმად, 2030 წლისთვის კრემლს ბელარუსის თანდათანობით, ნაწილ-ნაწილ ანექსია სურს. საიდუმლო დოკუმენტებზე The Telegraph-ი წერს
17-გვერდიანი დოკუმენტი „რუსეთის ფედერაციის სტრატეგიული მიზნების ბელარუსში“ Süddeutsche Zeitung-ის, Westdeutscher Rundfunk-ის, Norddeutscher Rundfunk-ის, ლონდონური Dossier Center-ის, Kyiv Independent-ის, Delfi Estonia-ის, Belarusian Investigative Center-ის, შვედური Expressen-ის, Yahoo News-ის, პოლონური Frontstory-ს და Vsquare-ს ჟურნალისტების ხელში აღმოჩნდა.
დოკუმენტი ორი ნაწილისგან შედგება. პირველ რიგში, ჩამოთვლილია რუსეთის სტრატეგიული - მოკლევადიანი (2022 წლამდე), საშუალო (2025 წლამდე) და გრძელვადიანი (2030) მიზნები ბელარუსში. შემდეგ მოცემულია ის სფეროები, სადაც კრემლს 2030 წლისთვის ბელორუსის ანექსიის მიმართულებით წინსვლა სურს. ესენია: პოლიტიკა, შეიარაღებული ძალები და თავდაცვა, ვაჭრობა და ეკონომიკა, ასევე სოციალური სექტორი.
2030 წლისთვის დაგეგმილია ბელარუსულ პოლიტიკაში, არმიასა და ბიზნეს-ელიტაში პრორუსული ჯგუფების მხარდაჭერა, ასევე სამხედრო ძალების გაფართოება.
ეკონომიკაში ქვეყნებს შორის ყველა სავაჭრო ბარიერების გაუქმებაა დაგეგმილი. მათ შორის - ბელარუსის ბირთვული ელექტროსადგურის ინტეგრირება საკავშირო სახელმწიფოს ელექტროქსელში და ბელარუსული ტვირთის ტრანსპორტირების გადამისამართება რუსული პორტებისკენ.
რაც შეეხება სამოქალაქო საზოგადოების ასიმილაციას, მოსკოვი ითვალისწინებს ბელარუსული სტუდენტების რიცხვის გაზრდას რუსეთის უნივერსიტეტებში. გარდა ამისა, დაგეგმილია მეზობელ ქვეყანაში რუსული მედიის პოზიციების გაძლიერება.
სტრატეგიული დოკუმენტის თანახმად, 2030 წლისთვის, რუსეთმა უნდა უზრუნველყოს ბელარუსის რესპუბლიკის საინფორმაციო სივრცეზე კონტროლი და რუსული ენის დომინანტურ პოზიციაზე ყოფნა.
რუსეთი ასევე გეგმავს ბელარუსებისთვის რუსული პასპორტების გაცემას და ე.წ. „პასპორტიზაციას“. წინააღმდეგობის შემთხვევაში, კრემლმა შეიძლება განახორციელოს რეგიონში ძალადობრივი ჩარევა და ამ ნაბიჯს იმით გაამართლებს, რომ „საკუთარი თანამემამულეების“ უფლებებს იცავს, წერს გამოცემა.
„ბელარუსში რუსეთის მიზნები იგივეა, რაც უკრაინაში. განსხვავება იმაშია, რომ მოსკოვი ბელარუსთან იძულების მექანიზმს იყენებს და არ ცდილობს ომის დაწყებას. საბოლოო ჯამში, ორივე შემთხვევაში მიზანი დიდი რუსეთის აღდგენაა, ” - ამბობს აშშ -ს ელჩი ევროპის უსაფრთხოებისა და თანამშრომლობის ორგანიზაციაში (ESCE) მაიკლ კარპენტერი.