„აზოვსტალის“ სამხედრო ექიმი, ყირიმელი თათარი ასან ისენაჯიევი რუსების ტყვეობიდან 31 დეკემბერს, სხვა 140 უკრაინელ ტყვე ჯარისკაცთან ერთად გათავისუფლდა. ასან ისენაჯიევმა უკრაინელებს სოციალურ ქსელში გათავისუფლებიდან 3 კვირის შემდეგ მიმართა. მან პოსტი ინსტაგრამზე გამოაქვეყნა, სადაც მისი ბოლო პოსტი 2022 წლის მაისით იყო დათარიღებული.
მისი თქმით, ეს ახალი წელი მისთვის ნამდვილ დღესასწაულად იქცა და გახდა არა მხოლოდ ახალი წლის, არამედ ახალი ცხოვრების დასაწყისიც. მან მადლობა გადაუხადა ყველას, ვინც ძალისხმევას არ იშურებდა ტყვეების გასათავისუფლებლად.
„მადლობა თქვენ! მე ბედნიერი ვარ რომ საყვარელი ადამიანების ჩახუტება შემიძლია. თავდაცვის 83 და ტყვეობის 227 დღის განმავლობაში მე ვოცნებობდი და წარმომედგინა ეს დღე. წარმოუდგენლად ბევრი შეტყობინება და ზარია მადლიერების სიტყვებით, წარმოუდგენელი რაოდენობის მხარდაჭერა და დახმარება. ფიზიკურად ყველას ვერ ვპასუხობ, მესიჯები ნამდვილად ბევრია. ქვეყანა შეიცვალა. ხალხი გახდა ერთიანი, სადაც ყველა ერთმანეთს ეხმარება, განურჩევლად სოციალური სტატუსისა, იქნება ეს მომღერალი, ტელეწამყვანი, ბლოგერი, სპორტსმენი, მოდელი, მასწავლებელი, ბანკის მფლობელი, ექიმი, მზარეული. თქვენ შეუდარებლები ხართ! როგორც ახლაა, ასე უნდა იყოს ყოველთვის, ომის სტატუსის მიუხედავად.“ - დაწერა მან. მისი თქმით ძალიან განიცდის თანამებრძოლების ბედს, რომლებიც კვლავ რუსების ტყვეობაში რჩებიან.
„ძალიან მტკივა, რომ ჩემი თანამებრძოლები, რომლებიც ჩემთან ერთად იყვნენ მარიუპოლსა და აზოვსტალში, თავის დღეებს ტყვეობაში ატარებენ. თანავუგრძნობ თითოეულ დედას, მამას, ცოლს, შვილს, ამ სისხლიან ბრძოლაში ახლობლების დაკარგვის გამო.
700-ზე მეტი დამცველი ჯერ კიდევ ტყვეობაშია და ჩვენ ძალისხმევა უნდა ჩავდოთ მათ დასახსნელად, მაშინ სახლში დაბრუნების ბედნიერება ნამდვილად სრულყოფილი იქნება. ჩვენი ქვეყანა ყოველდღე კარგავს თავის ვაჟებსა და ქალიშვილებს, ფრონტის ხაზზე და ქალაქებში, ფრონტის ხაზებიდან ასობით კილომეტრში. ჩვენ ჯერ არ მოგვიშუშებია დნეპროში მომხდარი ტერაქტი, როცა ბროვარში ტრაგედია დატრიალდა. ყოველდღე ჩვენი ქვეყანა კარგავს მომავალ ექიმებს და მასწავლებლებს, არქიტექტორებს და IT სპეციალისტებს, ფერმერებს და იურისტებს“, - აცხადებს ის.
მისი თქმით, მას ყველაფერი აქვს რეაბილიტაციისთვის და თუ ვინმეს მისი დახმარების სურვილი აქვს, ეს დახმარება დაბომბვებისგან დაზარალებულებს ან ფრონტზე მყოფ ჯარისკაცებს გაუგზავნოს.
სამხედრო ექიმი საყოველთაოდ ცნობილი მას შემდეგ გახდა, რაც მან ალყაში მოქცეული მარიუპოლის მეტალურგიული ქარხანა „აზოვსტალიდან“, რომელიც უკრაინელი დამცველების ბოლო ციხესიმაგრედ იქცა, თურქეთის პრეზიდენტ რეჯეფ ტაიპ ერდოღანს მიმართა და ევაკუაციის განხორციელებაში უკრაინისთვის დახმარების გაწევა სთხოვა.
ცნობისთვის, თურქეთმა მნიშვნელოვანი როლი ითამაშა „აზოვსტალის“ მცველთა მეთაურების ტყვეობიდან დახსნაში, არსებული შეთანხმებით ტყვეობიდან გათავისუფლებული 5 სამხედრო მეთაური, რომელთა შორის 3 აზოველია, საბრძოლო მოქმედებების დასრულებამდე თურქეთში, პრეზიდენტ რეჯეფ ტაიპ ერდოღანის პროტექციის ქვეშ დარჩება.