პანდემიამდე საქართველოში ტექნიკის მსხვილი მაღაზიების ბრუნვა 0.5 მლრდ ლარს აჭაბებდა. შემოსავლის უდიდესი ნაწილი სამ კომპანიაზე: „ალტაზე,“ „ელიტ ელექტრონიქსსა“ და „ზუმერზე“ მოდიოდა. 2019 წელს 249 მლნ-იანი ამონაგებით პირველი ადგილი „ალტამ“ დაიკავა.

„ალტა“ 1998 წელს დაარსდა. 2016 წლის 11 მაისს შპს „ალტამ“ და შპს „ოქეიმ“ დააფუძნეს ერთობლივი საწარმო შპს „ალტაოქეი“. 2019 წლის 15 ივლისს შპს ალტამ შეიძინა შპს ალტაოქეის 50%-იანი წილი შპს ოქეისგან და გახდა კომპანიის 100%-იანი წილის მფლობელი. შპს ალტაოქეის კი შეეცვალა სახელწოდება და დარეგისტრირდა, როგორც შპს „ალტა რითეილი“. დღეს კომპანია 5 ქალაქში: თბილისი, რუსთავი, გორი, ქუთაისი, ბათუმი 12 მაღაზიითაა წარმოდგენილი. ალტა ასევე ფლობს „მეტრო-მარტის“ 50%-იან წილს რომელიც თავის მხრივ იმავე 5 ქალაქში 6 მაღაზიითაა წარმოდგენილი.

ალტა იმპორტირებულ ელექტრო ტექნიკას ყიდის როგორც საცალო და საბითუმო ქსელში, ასევე კორპორატიულ მომხმარებლებზეც. პროდუქციის ძირითადი ხაზი სმარტფონები, ლეპტოპები და ტელევიზორებია. თუმცა ჩამონათვალში ასევე შედის: მაცივარი, სარეცხი მანქანა, კონდიციონერი, გაზქურა და სხვა საყოფაცხოვრებო ტექნიკა.

2019 წლის მდგომარეობით „ალტას“ 596 ადამიანი ჰყავდა დასაქმებული. სახელფასო ხარჯმა იმავე წელს 5.850 მლნ ლარი შეადგინა. წმინდა მოგებამ - 6.237 მლნ ლარი.

177 მლნ ლარიანი შემოსავლით მეორე ადგილს „ელიტ ელექტრონიქსი“ იკავებს. ბევრად ნაკლებია მოგება, რომელიც 1.257 მლნ ლარს შეადგენს, მაშინ როცა 2017 წელს 9.786 მლნ ლარი იყო.

„ელიტ ელექტრონიქსი“ 2005 წელს შპს-ს ფორმით დაარსდა, 2007 წელს კი სააქციო საზოგადოებად ტრანსფორმირდა. კომპანია საქართველოში 17 საკუთარ და 5 ფრანჩაიზული ტიპის მაღაზიას ფლობს. მათ შორის 5-ს თბილისში და 2-ს ბათუმში. დასაქმებულთა რაოდენობა 570-ს შეადგენს.

კომოანიის 51%-იან წილს შპს „დიჯითალ ეიჯი“ ფლობს, დარჩენილ 49%-იან წილს კი შპს „სის ინთეგრეიშენი.“ ორივე მათგანი ისრაელშია რეგისტრირებული. 2009 წლიდან „ელიტ ელექტრონიქსი“ რეაბილიტაციის პროცესში იმყოფება, რომლის დასრულებაც 2022 წელსაა დაგეგმილი.

სხვა ქსელური მაღაზიებისგან განსხვავებით „ზუმერი“ ძირითადად სმარტფონებზეა ორიენტირებული. კომპანიის შემოსავალი 2019 წელს, 2018 წელთან შედარებით მნიშვნელოვნად 68%-ით 168 მლნ ლარამდე გაიზარდა. წმინდა მოგება კი პირიქით 2.036 მლნ-დან 1.163 მლნ-მდე შემცირდა.

„ზუმერმა“ ოპერირება 2009 წელს თბილისში 1 ფილიალით დაიწყო და მხოლოდ საბითუმოდ ვაჭრობდა. საცალო ბაზარზე კი 3 წლის შემდეგ გავიდა. ამჟამად კომპანია თბილისში, ქუთაისში, ბათუმში, რუსთავში, ზუგდიდში, თელავსა და ახალციხეში 16 მაღაზიას ფლობს. სმარტფონების გარდა გასაყიდ პროდუქციის ჩამონათვალში შედის ასევე: ლეპტოპები, ფოტოაპარატები, აუდიო-ვიდეო ტექნიკის აქსესუარები...

მცირე მაღაზიების სპეციფიკიდან გამომდინარე ქსელში მხოლოდ 200 ადამიანია დასაქმებული.

2020 წელს ჯამში 3 თვეზე მეტი ტექნიკის მაღაზიები დაკეტილი იყო, რაც მათ შემოსავლებზე აუცილებლად აისახებოდა. 2020-ის ფინანსური ანგარიშგებები ჯერ არ გამოქვეყნებულა, წინასწარ მიახლოებითი რიცხვების დასახელებაც შეუძლებელია, თუმცა ვარდნა მაინც გარდაუვალია.