პანდემიამ ქაღალდისა და მუყაოს პროდუქციის მწარმოებელ უმსხვილეს ქართულ კომპანია ,,გრინპაკს“ პრობლემა შეუქმნა. ჩინეთიდან ლოგისტიკის კატასტროფული გაძვირების შემდეგ კომპანიამ აქცენტი თურქულ ბაზარზე აიღო, თუმცა მდგომარეობას ვერც ამან უშველა. როგორც ,,გრინპაკის“ დამფუძნებელი, ბიზნესმენი პაატა აბრამია ,,კომერსანტთან“ ამბობს, ადგილზეც პრობლემას ქმნის სავალუტო რყევები და კადრების დეფიციტი, რა პირობებში ბიზნესი რეალურად ვერ ვითარდება.

,,ძალიან გაძვირებულია ლოგისტიკის მიმართულება და ჯერჯერობით  პირი არ უჩანს გაიაფებას. საზღვაო კონტეინერებს ვერიდებით,  განსაკუთრებით ჩინეთიდან, სადაც გადაზიდვების კატასტროფული გაძვირებაა. მართალია, იქ იაფია ნედლეული, მაგრამ ტრანსპორტირება იმპორტს აძვირებს, რის გამოც იძულებული გავხდით, ალტერნატიული ბაზარი მოგვეძებნა. ჩვენ შემთხვევაში აქცენტი თურქეთზე გავაკეთეთ. იქ ნედლეული ძვირი ღირს, სამაგიეროდ, ტრანსპორტირება შედარებით იაფი ჯდება და ამით ვაბალანსებთ. მთლიანობაში ხარჯი 2-2,5-ჯერ გაგვეზარდა პანდემიამდელ პერიოდთან შედარებით, რაც ბიზნესისთვის საკმაოდ დიდი ტვირთია“, - ამბობს ბიზნესმენი.

პაატა აბრამია ადგილობრივი ბაზრის პრობლემაზეც საუბრობს და დასძენს, რომ კვალიფიციური კადრების დიდი დეფიციტია.

მისი თქმით, ამ ეტაპზე 30 ადამიანია ,,გრინპაკში“ დასაქმებული და არის აგრეთვე 15-20 ადამიანის დამატების შესაძლებლობაც, მაგრამ ხალხს ვერ შოულობს.

,,ადგილობრივ ბაზარზე სხვადასხვა პრობლემაა. პირველ რიგში, ეს არის ლარის კურსი. სავალუტო რყევები ძალიან ნეგატიურად მოქმედებს, სტაბილურობის განცდა არ არის. შეიძლება წარმოებაში კლება არ არის, მაგრამ გეგმაზომიერად ვერ ვვითარდებით. კადრები დამატებით ერთი დიდი პრობლემაა. ვინც საქმე იცის, შრომისუნარიანი მოსახლეობა,  ქვეყნიდან გარბის. მუშახელის უზარმაზარი პრობლემაა, რაც დიდი დაბრკოლებაა კომპანიებისთვის. ამ ეტაპზე გვაქვს რესურსი, დამატებით 15-20 კადრი ავიყვანოთ, ძირითადად სტაჟიორები შეიძლება დავამატოთ, მაგრამ აქაც  ვაწყდებით პრობლემას - ხუთი სტაჟიორიდან ზოგ შემთხვევაში ერთიც ვერ ამართლებს. პროფესიული განათლების მიმართულება უნდა განვითარდეს ქვეყანაში, თითქოს ნაბიჯები იდგმება, მაგრამ საშველი ვერ დაადგა. გლობალურად არის კადრების პრობლემა პანდემიიდან გამომდინარე და სახელმწიფო ამ საკითხის მოგვარებაში ჯერჯერობით უძლურია“, - აცხადებს ,,კომერსანტთან“ პაატა აბრამია.

ცნობისთვის, 2014 წელს დაფუძნებული შპს „გრინპაკი“ ქაღალდისა და მუყაოს პროდუქციის წარმოებაზე ორიენტირებული კომპანიაა (ქაღალდის პარკები, ჭიქები, თეფშები, სხვადასხვა სახეობის მუყაოს ყუთები და შესაფუთი საშუალებები), რომლის საქმიანობის ძირითად მიმართულებას ასევე უქსოვადი ქსოვილის (ტომრები, პაკეტები, დეკორატიული და სხვა ნაწარმი) წარმოებაც წარმოადგენს.

სახელმწიფო პროგრამის ,,აწარმოე საქართველოს“ ფარგლებში განხორციელებულ პროექტში ჯამური ინვესტიციის მოცულობა $5 მლნ–ს შეადგენს.

კომპანიამ მეწარმეობის განვითარების სააგენტოსთან თანამშრომლობა 2017 წლის დეკემბერში დაასრულა და ბაზარზე ოპერირებას დამოუკიდებლად აგრძელებს. 

მარი ჩიტაია