გაეროს ანალიტიკოსები სურსათის დეფიციტსა და მათზე ფასების არნახულ ზრდას პროგნოზირებენ. FEMA–ს (ამერიკის განსაკუთრებულ სიტუაციათა მენეჯმენტის დეპარტამენტის) პროგნოზით, მომდევნო 25-30 წელიწადში სურსათი სულ უფრო დეფიციტური გახდება და ფასები მათზე 300-350%-ით გაიზრდება. ამის მიზეზი, არც მეტი, არც ნაკლები, მოსახლეობის რაოდენობის ზრდაა, რაც სურსათის დეფიციტს გამოიწვევს.

ცნობილია გაეროს პროგნოზი, რომლის მიხედვითაც აღნიშნულ პერიოდში მოსახლეობის რაოდენობა 9-10 მილიარდი იქნება. მთავარი გამოწვევა კაცობრიობისთვის, როგორც სოფლის მეურნეობის საერთაშორისო ასოციაციის ხელმძღვანელი კობა კობალაძე აღნიშნავს, მიწების სიმცირეა.

,,სურსათის წარმოებისათვის საჭირო მიწის რესურსები სულ უფრო მცირდება. ინდოეთში 1 კვ/კმ-ზე მოდის 450 მოსახლე, ჩინეთში - 500, ხოლო რუსეთის შემთხვევაში, ეს მაჩვენებელი 7 მოსახლეს ითვლის. დედამიწის 2/3 წყლებსა და ოკეანეებს უკავია, ერთი მესამედი ხმელეთს და მხოლოდ მისი 12% არის ვარგისი სასოფლო–სამეურნეო წარმოებისათვის. მთელ მსოფლიოში სურსათის დეფიციტი გახდება დიდი გამოწვევა, მათ შორის, საქართველოსთვის, რომელიც მცირემიწიანი ქვეყანაა. დედამიწაზე პირველად მილიარდი მოსახლე 1820 წელს დაფიქსირდა. ხოლო ორას წელიწადში მოსახლობა უკვე თითქმის 7 ჯერ გაიზარდა, პროგნოზებით 2050 წლისათვის 9-10 მილიარდი იქნება. ცხადია ისიც, რომ მოსახლეობის ზრდასთან ერთად სურსათის და წყლის მოპოვება სულ უფრო გართულდება. ამერიკის განსაკუთრებულ სიტუაციათა მენეჯმენტის დეპარტამენტის ექსპერტების გამოკვლევებით, მომავალ 25-30 წლებში სურსათი სულ უფრო დეფიციტური გახდება და ფასები მათზე 300-350%-ით გაიზრდება, ეს კი სურსათზე ხელმისაწვდომობის შემცირებას, გლობალურ შიმშილობას გამოიწვევს, რაზეც გაეროს ანალიტიკოსები წლებია საუბრობენ“, - უთხრა კობა კობალაძემ ,,კომერსანტს“.

ცხადია, ზომების მიღება მოუწევს მსოფლიოს ყველა სახელმწიფოს, მათ შორის საქართველოს, სადაც, კობალაძის განმარტებით, დეფიციტზე მეტად, კვების რეჟიმი და სასურსათო პროდუქტის კალორიულობის მხრივ გველის პრობლემა. მეცნიერის შეფასებით, საქართველოს აქვს რეალური შესაძლებლობა, რომ გამოკვებოს საკუთარი მოსახლეობა და იმპორტზე მინიმალურად იყოს დამოკიდებული.

,,განსაკუთრებული ყურადღება მიწას და წყალს უნდა მიექცეს. ამისთვის კი, აუცილებელია აგრარული სექტორში ახალი ტექნოლოგიების დანერგვა, რაც მრავალ პრობლემას მოხსნის. პირველ რიგში, უნდა დავიწყოთ მიწების დამცავი სასოფლო-სამეურნეო ტექნოლოგიის და ტექნიკის გამოყენება. დიდი მნიშვნელობა აქვს აგრეთვე მიწების გასარწყავებას, სადაც თვითდინება არ იქნება შესაძლებელი, ჭაბურღილი გაკეთდეს. ამ მიმართულებით ბოლო დროს მთავრობის მხრიდან გარკვეული ქმედითი ნაბიჯები იდგმება, რაც კარგია, მაგრამ მეტად უნდა გააქტიურდეს მუშაობა, რათა გლობალურ გამოწვევას გავუმკლავდეთ. აუცილებლად უნდა გაკეთდეს აქცენტი ძვირადღირებული პროდუქციის წარმოებაზე. სწორი აგრარული პოლიტიკის პირობებში საქართველოს შეუძლია დაახლოებით 4-5-ჯერ გაზარდოს სამხრეთული კულტურების წარმოება. გარდა ამისა, მეტი ყურადღება მიექცეს წყალსაცავების გაკეთებას, რადგან სურსათის დეფიციტამდე შეიძლება დადგეს წყლის გამოყენების პრობლემა. შეიძლება ითქვას, რომ ფიზიოლოგიურ დონეზე შიმშილობის პრობლემა არ გვემუქრება, თუმცა პრობლემაა კვების რეჟიმი, რადგან ე.წ. ძვირი კალორიები ხალხისთვის მიუწვდომელია. შესაბამისად, რაციონში პური დიდი რაოდენობით გამოიყენება“, - განმარტავს კობალაძე.

გაერო-ს განცხადებით, 2030 წლისთვის მსოფლიოს მოსახლეობა თითქმის მილიარდი ადამიანით გაიზრდება, ხოლო 2100 წლისთვის კი 11 მილიარდს გადააჭარბებს.

დოკუმენტის თანახმად, მოსახლეობის ყველაზე სწრაფი ზრდა ნიგერიაში ფიქსირდება.

,,2050 წლისთვის ეს ქვეყანა (ნიგერია) მსოფლიოში მოსახლეობის სიმრავლით მეშვიდე ადგილიდან მესამეზე გადავა და აშშ-ს გაუსწრებს, - აცხადებენ გაეროში.

ორგანიზაციის ინფოგრაფიკის თანახმად, 2030 წლისთვის მსოფლიოს მოსახლეობა 8.5 მილიარდი იქნება, 2050 წლისთვის - 9.7 მილიარდი, ხოლო 2100 წლისთვის — 11.2 მილიარდი.

Countrymeters-ის მონაცემებით, დღეს პლანეტაზე 7.9 მილიარდი ადამიანი ცხოვრობს.

მარი ჩიტაია