რუსეთ-უკრაინის ომმა, ისევე როგორც მთელ მსოფლიოში, საქართველოშიც შეცვალა არსებული ეკონომიკური ზრდის პროგნოზები. მაშინ, როდესაც საქართველოს 2022 წლის ბიუჯეტი ეკონომიკის 6%-იან ზრდაზეა დაგეგმილია, საერთაშორისო და ადგილობრივი ორგანიზაციები ერთხმად ამბობენ, რომ ასეთ მაღალ მაჩვენებელს ქვეყანა არათუ მიმდინარე წელს, 2023-შიც ვერ მიაღწევს.
მიიღე ინფორმაცია უფრო სწრაფად „კომერსანტის“ Telegram-ზე.
მიმდინარე წლის ბიუჯეტის მიხედვით დაგეგმილი 6%-იან ეკონომიკური ზრდის ფინანსთა სამინისტროშიც აღარ სჯერათ. ფინანსთა მინისტრის მოადგილე გიორგი კაკაურიძე აცხადებს, რომ უკრაინაში მიმდინარე ომის გამო, საქართველოს ეკონომიკამ შესაძლოა 1 მილიარდი დოლარით იზარალოს. მისი განმარტებით, წელს 6%-იანი ეკონომიკური ზრდის მიღწევა შეუძლებელი იქნება, ამიტომ სამინისტრო საერთაშორისო საფინანსო ორგანიზაციებთან ერთად უკვე მუშაობს აღნიშნული პროგნოზის დაკორექტირებაზე.
საქართველოს ეროვნულ ბანკში აღნიშნავენ, რომ წინა პროგნოზებით, 2022 წელს 5 პროცენტიანი ზრდა იყო მოსალოდნელი, თუმცა, დღევანდელი გადმოსახედიდან, ზრდის ტემპი 3-4 პროცენტის ფარგლებში იქნება. უფრო პესიმისტრური განწყობა აქვთ საბანკო ასოციაციაში, მათი შეფასებით, მიმდინარე წელს საქართველოს ეკონომიკა 2.5-3%-ის ფარგლებში გაიზრდება. როგორც ასოციაციაში აცხადებენ, უკრაინაში მიმდინარე ომი გავლენას მოახდენს როგორც ეკონომიკურ ზრდაზე, ასევე უშუალოდ საბანკო სექტორის პორტფელის ზრდის ტემპზე.
გაცილებით დამაიმედებელი პროგნოზი აქვთ ადგილობრივ საინვესტიციო ბანკებში. TBC Capital წელს 4%-ზე მაღალ ეკონომიკურ ზრად ელის. მათი ინფორმაციით, ტურიზმისა, გზავნილების და ასევე სხვა მაჩვენებლების დინამიკა მიუთითებს, რომ წლევანდელი მოლოდინი ადრინდელ 3.5-4.0%-იან დიაპაზონს მნიშვნელოვნად აღემატება.
Galt & Taggart-ის ანალიტიკოსები კი წელს საქართველოს მშპ-ის დაახლოებით 3.0%-ით ზრდას ვარაუდობენ. თუმცა, საქართველოში მიგრანტების შემოდინება რუსეთიდან, უკრაინიდან და ბელარუსიდან, შესაძლოა, წლის ბოლოს მშპ-ის ზრდის მაჩვენებელზე დადებითად აისახოს. ასევე, მოსალოდნელია, რომ საერთაშორისო ტვირთბრუნვის საქართველოში გადმოტანამ მშპ-ის დონე გაზარდოს. გასათვალისწინებელია საერთაშორისო კომპანიების საქართველოში გადმოსვლის შესაძლებლობაც. აღნიშნულის გათვალისწინებით, Galt & Taggart არ გამორიცხავს, რომ 2022 წლის ბოლოს საქართველოს ეკონომიკა არა 3.0%-ით, არამედ 4.0-4.5%-ით გაიზარდოს.
პესიმისტური პროგნოზები აქვთ საერთაშორისო სავალუტო ფონდში და ევროპის რეკონსტრუქციისა და განვითარების ბანკში. სავალუტო ფონდი 2022 წელს საქართველოს ეკონომიკური ზრდის პროგნოზს 3%-მდე ამცირებს. თუმცა უკვე 2023 წლიდან ზრდის ტემპისა და სხვა ძირითადი ეკონომიკური მაჩვენებლების გაუმჯობესებას ვარაუდობს.
რუსეთის უკრაინაში შეჭრით გამოწვეული ვითარების ფონზე, EBRD-მა ეკონომიკური ზრდის პროგნოზებს გადახედა და საქართველოსთვის სხვა ორგანიზაციებთან შედარებით ყველაზე ცუდი სცენარი იწინასწარმეტყველა. ევროპის რეკონსტრუქციისა და განვითარების ბანკმა საქართველოს 2022 წლის ეკონომიკური ზრდის პროგნოზი 3.5 პროცენტული პუნქტით, 2%-მდე შეამცირა. 2023 წლისთვის კი 4.5%-იან ზრდას პროგნოზირებს. EBRD-ის ახალი ანგარიშის თანახმად, ომი სერიოზულ გავლენას მოახდენს იმ ეკონომიკებზეც, რომლებიც კონფლიქტის უშუალო არეალს მიღმა არიან.