ჯანმრთელობის დაცვისა და სოციალურ საკითხთა კომიტეტის სხდომაზე სსიპ საპენსიო სააგენტოს 2022 წლის 6 თვის განმავლობაში განხორციელებული საქმიანობის ანგარიში მოისმინეს, რომელიც ამავე სააგენტოს დირექტორმა გიორგი დანელიამ წარადგინა. ინფორმაციას პარლამენტის პრესსამსახური ავრცელებს.

საპენსიო სააგენტოს დირექტორმა ანგარიშში ყურადღება გაამახვილა როგორც სააგენტოს საოპერაციო, ასევე საინვესტიციო საქმიანობაზე. მომხსენებლის ინფორმაციით, 2022 წლის 1 იანვრიდან 30 ივნისის ჩათვლით პერიოდში, საპენსიო შენატანების ადმინისტრირების ელექტრონულ სისტემაში დარეგისტრირდა 5,289 დამსაქმებელი და გაწევრიანებული იქნა 56,357 დასაქმებული. შედეგად, 2022 წლის 30 ივნისის მდგომარეობით, საპენსიო სქემაში გაწევრიანებულ დასაქმებულთა რაოდენობამ ჯამში 1,292,246 შეადგინა. ამავე პერიოდში სააგენტოს სისტემაში რეგისტრირებული დამსაქმებლების რაოდენობაა 88,090.

საპენსიო დეკლარაციების საფუძველზე 2022 წლის 30 ივნისის ჩათვლით საპენსიო ფონდში შეტანილი თანხის საერთო ოდენობამ 2 მილიარდ 170 მილიონზე მეტი ლარი შეადგინა. ხოლო საპენსიო სქემიდან კანონის 22-ე მუხლის შესაბამისად გასვლის, არასწორად გაწევრიანებული დასაქმებულის მიერ საპენსიო სქემის დატოვების, პენსიის დანიშვნის ან/და საპენსიო აქტივების გაცემის და მაკორექტირებელი დეკლარაციის საფუძველზე, ფონდიდან 69,346,283.75 ლარია გატანილი.

„კანონის თანახმად, საპენსიო აქტივების ინვესტირება კანონის ამოქმედებიდან 5 წლის განმავლობაში დასაშვებია მხოლოდ ნაკლებად რისკიან საინვესტიციო პორტფელში. შესაბამისად, 2022 წლის პირველ ნახევარში ინვესტირება ხორციელდებოდა ნაკლებად რისკიანი პორტფელით კანონით განსაზღვრული შეზღუდვების გათვალისწინებით. წლის ბოლომდე ვფიქრობთ, შემოდინებების, კონტრიბუციების და გაცემების ტენდენცია შენარჩუნდება. 2023 წელი უკვე ძალიან მნიშვნელოვანი წელია საპენსიო სააგენტოსთვის და ზოგადად ამ რეფორმისთვის, ვინაიდან 2023 წლის აგვისტოდან ჩვენი სქემის მონაწილეებს შეეძლებათ თვითონ აირჩიონ რომელი ტიპის, რა რისკიანობის პორტფელში უნდათ თავიანთი თანხების განთავსება. 2023 წლიდან სააგენტოს ექნება ასევე საშუალო რისკიანი და მაღალ რისკიანი პორტფელები, რომლებიც განსხვავდება, ერთი მხრივ, რისკიანობის მხრივ და, მეორე მხრივ, პოტენციური ამონაგებით და ყველას ექნება არჩევანის უფლება“, - განაცხადა გიორგი დანელიამ.

მან კანონმდებლებს სხვა სიახლეების შესახებაც მიაწოდა ინფორმაცია, რომელთა შემოღებას სააგენტო თავის საქმიანობაში გეგმავს.

კომიტეტმა საპენსიო სააგენტოს მიერ წარმოდგენილი ანგარიში დადებითად შეაფასა.