ფოთის პორტის მთლიანი შემოსავლები 2021 წელს გასულ წელთან შედარებით 4%-ით, 187,488 მლნ ლარამდე შემცირდა. როგორც კომპანიის ანგარიშებიდან ირკვევა, შემცირებულია წმინდა მოგებაც და 2021 წელს ის - 83,237 მლნ ლარი იყო, 2020 წელს კი - 121,151 მლნ ლარი.

არაფინანსური მაჩვენებლების მიხედვით, ანგარიშში აღნიშნულია, რომ 2021 წელს შემცირებული იყო პორტში შემავალი გემების რაოდენობა 771-მდე, როცა 2020 წელს სულ 878 გემი შევიდა. ასევე შემცირებულია კონტეინერების რაოდენობაც, რომელსაც პორტი მოემსახურა. 2021 წელს ეს იყო 302,082 TEU, 2020-ში კი რაოდენობა 387,368-ს შეადგენდა.

2021 წელს ფოთის პორტის ტვირთბრუნვამ 1.36 მილიონი ტონა შეადგინა, 2020 წელს კი 1.01 მილიონი ტონა.

„ამონაგები 4%-ით ნაკლებია 2020 წელთან შედარებით და შეესაბამება პორტში მართულ შემცირებულ მოცულობებს, ბაზარზე ზოგადი კრიზისის გამო. კონტეინერების ხელმისაწვდომობასთან დაკავშირებით მიმდინარე გამოწვევები გამოწვეულია პანდემიის გამო გლობალური მიწოდების ჯაჭვის შეფერხებით, ისევე იმითაც, რომ იმპორტიორებმა როგორც აზერბაიჯანში, ასევე სომხეთში, თავიანთი მარშრუტების ნაწილი აზიიდან ირანში გადაიტანეს. ჩვენ ნაწილობრივ შევამსუბუქეთ ეს ნეგატიური გავლენა არა-კონტეინერებული ტვირთების გადამუშავების შესაძლებლობების შემდგომი განვითარებით, რაც ასე მკვეთრად არ დაზარალებულა.

მოცემული ფინანსური ანგარიშგების თარიღისთვის კომპანიას გაწეული აქვს სატვირთო ტერმინალის მშენებლობის პროექტთან, რომელიც შენდება ძველი პორტის გაფართოების მიზნით, დაკავშირებული 7,400 ათასი ლარის ოდენობის კაპიტალური დანახარჯები“, — აღნიშნულია ანგარიშში.

სტრატეგიულად განლაგებული ფოთის საზღვაო ნავსადგური საქართველოში ყველაზე დიდი ნავსადგურია, რომელიც ამუშავებს თხევად და მშრალ ტვირთს, კონტეინერებსა და ბორნებს. მას 15 ნავმისადგომი აქვს, ნავმისადგომის ჯამური სიგრძით 2,900 მეტრი.

ფოთის პორტი საქართველოს უმსხვილესი ლოგისტიკური ცენტრია, რომელსაც APM Terminals მართვას. APM Terminals კი საპორტო ოპერირების კომპანიაა, რომლის სათაო ოფისიც ნიდერლანდებში მდებარეობს, კომპანია დანიის გადამზიდავი გიგანტის, Maersk-ის სატრანსპორტო და ლოგისტიკის განყოფილებას წარმოადგენს.