„აქსის თაუერსის” მფლობელმა სააქციო საზოგადოებამ, რომელიც თბილისში 149 მეტრის სიმაღლის ორ ცათამბჯენს აერთიანებს, 2021 წლის განმავლობაში 35.6 მილიონი ლარის შემოსავალი მიიღო, ხოლო მისი წმინდა მოგება 11.9 მილიონ ლარს შეადგენდა, მაშინ როდესაც 2020 წელს კომპანია 36 მლნ. ლარის ზარალზე იყო.
კომპანიის შემოსავლის ძირითადი წყარო უძრავი ქონების რეალიზაციიდან მომდინარეობდა. ფინანსური ანგარიშის მიხედვით, სს “აქსის თაუერსი” 281 მილიონის აქტივებს აერთიანებს, კომპანიის ვალდებულებები კი 292 მილიონი ლარია.
ორი 41-სართულიანი ცათამბჯენი საცხოვრებელ ბინებს, 16,700 კვადრატული მეტრის საოფისე სივრცეს და კომერციულ ფართს, ასევე 226-ნომრიან, Pullman-ის სასტუმროს აერთიანებს.
„2022 წელს გეგმაშია პროექტის სრულყოფილად დასრულება და გრანდიოზული გახსნა, რაც იმას ნიშნავს, რომ ფუნქციონირებას დაიწყებს Accor ჯგუფში შემავალი 5 ვარსკვლავიანი სასტუმრო „Pullman“ , საკომფერენციო სივრცეები, აუზი, სპა და ფიტნეს ცენტრი. უკვე მოქმედ მიმართულებებზე, როგორიცაა საოფისე და კომერციული სივრცეები, იგეგმება კომპანიების მოზიდვა და დატვირთულობის გაზრდა. რაც შეეხება საცხოვრებელ სივრცეებს, კომპანიის მენეჯმენტს მიზნად აქვს 2022 წლის ბოლოსთვის მოახდინონ ბინების სრული რეალიზება“, — აღნიშნულია ფინანსურ ანგარიშგებაში.
კომპანია დაარსდა 2014 წლის 26 დეკემბერს, როგორც სააქციო საზოგადოება და რეგისტრირებულია საქართველოში. შპს პულმან თბილისი აქსის თაუერსი არის 2021 წლის 21 დეკემბერს საქართველოში დაფუძნებული შეზღუდული პასუხისმგებლობის საზოგადოება, იმ განზრახვით, რომ სამომავლოდ მომსახურება გასწიოს როგორც სასტუმროს მართვის კომპანიამ. 2021 წლის 31 დეკემბრის მდგომარეობით მას არ აქვს მიმდინარე ოპერაციები. 2021 და 2020 წლების 31 დეკემბრის მდგომარეობით კომპანიის უშუალო მშობელი კომპანიაა შპს „აქსის თაუერსი“. 2021 და 2020 წლების 31 დეკემბრის მდგომარეობით კომპანიის საბოლოო მშობელი კომპანიაა GCF LP (რეგისტრირებულია კაიმანის კუნძულებზე), რომელიც კონტროლდება GCF GP-ს მიერ (რეგისტრირებულია კაიმანის კუნძულებზე) ანუ “თანაინვესტირების ფონდი”. თავის მხრივ, ამ ფონდის დამფუძნებელია ექს-პრემიერი ბიძინა ივანიშვილი. კომპანიის აქციონერთა სტრუქტურა შემდეგია: შპს „აქსის თაუერსი“ 60.98%; შპს „აქსის თაუერს ჰოლდინგი“ 39.02%.