Christina Aguilera, Scorpions, 30 seconds to mars, Aerosmith, jessie j, Black Eyed Peas -ლეგენდარული ჯგუფებისა და არტისტების სია, რომელთაც „ბლექ სი არენამ“ 6 წლის განმავლობაში უმასპინძლა, გრძელია, თუმცა საკონცერტო დარბაზის კარები თითქმის ორი წელია დახურულია. 10 000-მდე მაყურებელზე გათვლილი სივრცე საერთაშორისო მუსიკალური სცენის ვარსკვლავებს კორონავირუსით გამოწვეული პანდემიის გამო ვეღარ იღებს.
მიუხედავად იმისა, რომ დარბაზში ღონისძიებების ჩატარება ვერ მოხერხდა, როგორც ყველამ, „ბლექ სი არენა“-ს მენეჯმენტმაც მუშაობა ალტერნატიულ პროექტებზე დაიწყო. გამოსავალი საკონცერტო დარბაზიდან 2 წუთის სავალზე არსებული „მუსიკოსთა პარკი“ და „სოციალურ სივრცე“ აღმოჩნდა. „ბლექ სი არენას“-ს დირექტორი ტატო ხარჩილავა აცხადებს, რომ უსაფრთხოების ნორმების დაცვით, ღონისძიებების გაკეთების შესაძლებლობა გარე - ეკომეგობრულმა სივრცემ მისცა, რომლის აქტიური განახლება 2020 წლიდან დაიწყო.
„პანდემიის გამო 2020 წელს დაანონსებული პროექტის შეჩერება და 2021 წელს გადადება მოგვიწია. თუმცა, „ბლექ სი არენას“ კარები 2021 წელსაც ვერ გაიხსნა. მაგრამ, პანდემიურ რეალობას მოვერგეთ და მაქსიმალური კონცენტრაცია ღია ღონისძიებებზე მოვახდინეთ, რომელიც „მუსიკოსთა პარკში“ გაიმართა. მიმდინარე წელს ღონისძიებები გვქონდა როგორც ქართული, ასევე უცხოელი არტისტების მონაწილეობით. „მუსიკოსთა პარკში“ ასევე გაიხსნა „სოციალური სივრცე“, რომლის პირველი სტუმარიც ავსტრიელი მუსიკოსი და ეკოაქტივისტი MANU DELAGO იყო. 21 აგვისტოს სცენა Diana King-სა Henry Saiz & Band-ს უნდა დაეკავებინა, თუმცა ღონისძიება 2022 წელს გადავიტანეთ, რადგან 14 აგვისტოს ქვეყანაში შეზღუდვები დაწესდა. ჩვენი ალტერნატიული პროექტი იყო მუსიკოსთა პარკის საიდუმლო ანუ დაუჯერებელი ამბავი. ეს იყო ინტერნეტ პროექტი, რომელშიც მონაწილეობას 12 გურული ბავშვი და ოზურგეთის თეატრის მსახიობები იღებდნენ“, - განაცხადა ტატო ხარჩილავამ.
ტატო ხარჩილავა გვიყვება, რომ „ბლექ სი არენა“ 2022 წლის სეზონს 28 მიასს ONEREPUBLIC-ის კონცერტით გახსნის. თუმცა, ამბობს, რომ პანდემიური რეალობიდან გამომდინარე თარიღი შეიძლება შეიცვალოს. „ბლექ სი არენას“ დირქტორს იმედი აქვს, რომ 2022 წელს ყველაფერი კარგად იქნება საკონცერტო დარბაზის კარები გაიღება:
„პანდემიიდან გამომდინარე სამომავლო გეგმებზე საუბარია რთულია, დიდი იმედი გაქვს, რომ „ბლექ სი არენა“ გაიხსნება და ღონისძიებები, მხოლოდ „მუსიკოსთა პარკში“ არ ჩატარდება. იმედია, რომ მინიმუმ 2020 წელს დაანონსებულ ONEREPUBLIC-სა და Nile Rodgers & Chic-ს კონცერტებს მაინც გავაკეთებთ. პარკი და „სოციალური სივრცე“ კი თავისთავად, დაანონსებული და ახალი არტისტებით განაახლებს მუშაობას“, - ამბობს ტატო ხარჩილავა.
„ბლექ სი არენას “ დირექტორს ვკითხეთ, ჩატარებული ღონისძიებებით რა შემოსავალი მიიღო კომპანიამ და იქნება თუ არა 2021 წელიც ზარალიანი. ხარჩილავამ საკითხზე საუბარი არ ისურვა. გვითხრა, რომ შემოსავალს ყოველწლიური აუდიტის გამოქვეყნების შემდეგ გავიგებდით. დეტალურად ვერც ის გავიგეთ, როგორ მართა „ბლექ სი არენას“ მენეჯმენტმა 2021 წლის ბიუჯეტი.
„როგორც უკვე აღვნიშნე, კონცერტები ჩატარდა როგორც „მუსიკოსთა პარკში“ ასევე „სოციალურ სივრცეში“. 2022 წელს, თუ პანდემიამ ხელი არ შეგვიშალა, მაქსიმალურად ვეცდებით, რომ კონცერტები ჩატარდეს, რაც შემოსავალს თავისთავად გულისხმობს“, - განაცხადა ტატო ხარჩილავამ.
შეგახსენებთ, რომ დარბაზის მშენებლობა 2008 წელს ბიძინა ივანიშვილის ფონდ „ქართუს“ ინიციატივით და $115 მილიონზე მეტი ინვესტიციით დაიწყო. „ბლექ სი არენა“ ოფიციალურად 2016 წელს Christina Aguilera-ს კონცერტით გაიხსნა. 2019 წელს დარბაზი სამართავად საქართველოს განათლების, მეცნიერების, კულტურისა და სპორტის სამინისტროს გადაეცა.
კონსოლიდირებული აუდიტორული ანგარიშის მიხედვით ირკვევა, რომ 2017-2018-2019 და 2020 წელი „ბლექ სი არენასთვის“ ზარალიანი იყო. ოფიციალურ დოკუმენტში ვკითხულობთ, რომ შპს “ბლექ სი არენა ჯორჯია“-ს ზარალმა გასულ პანდემიურ წელს 4,5 მლნ შეადგინა. ეს რიცხვი 2019-ში 2, 2 მლნ იყო, 2018-ში 4,3 ხოლო 2017- ში 6,4 მლნ.
აღსანიშნავია, რომ „ბლექ სი არენამ“ 2020 წელს სახელმწიფო სუბსიდიებიდან 4 მლნ შემოსავალი მიიღო, 2019 წელს 10,4 მლნ, 2018 წელს კი 7 მლნ, 2017 წელს კი 11 მლნ.
ბაჩო ადამია