„საპოვნელა“ 100%-ით ნატურალური საპნებისა და სხეულის მოვლის 100-მდე საშუალებას აწარმოებს. ბრენდის შექმნის იდეა 4 წლის წინ, ლეჩხუმში, ზღვის დონიდან 560 მეტრზე აშენებულ „გვესოს ფერმაში“ გაჩნდა. როგორც „კომერსანტთან“ საუბრისას „საპოვნელას“ ერთ-ერთმა დამფუძნებელმა რუსუდან კბილაშვილმა განაცხადა, ამ ეტაპზე „საპოვნელაში“ 15-მდე ადამიანია დასაქმებული, ბრენდს აქვს ბუტიკური სახლი ვაკეში, მცხეთის ქუჩაზე, ახლახან კი „საპოვნელას“ სტენდი „თბილისი მოლშიც“ გამოჩნდა
რუსუდან კბილაშვილის თქმით, „საპოვნელას“ კორპორაციული უპირატესობა მის 100%-ით ნატურალურობაში გამოიხატება.
„კომპანია თხის რძით გამდიდრებულ, ძვირფასი მცენარეული ზეთებით, კარაქებით, ეთერზეთებით, სასარგებლო კოსმეტიკური თიხებით და სამკურნალო მცენარეებით დამზადებულ საპნებს, დეოდორანტებს, სახის, თვალისა და ტანის კრემებს, ბრჭყვიალა ზეთებს, კრემებს, აბაზანის ჩაისა და მარილებს, სახისა და ტანის სკრაბებს და სხვა თავის მოვლის საშუალებებს ხელით, ყოველგვარი ხელოვნური, ქიმიური დანამატების გარეშე ამზადებს“, - აცხადებს რუსუდან კბილაშვილი.
როგორც ცნობილია, ყოველწლიურად ქალის ორგანიზმში დაახლოებით 3 კილოგრამი კოსმეტიკა ხვდება, რომელთა შემცველობაშიც მაღალია ტყვიის, ნიკელს, პარაბინის, ბერილიუმის, დარიშხანის, კადმიუმის და სხვა მავნე დანამატების წილი, რომლებიც ორგანიზმში ხანგრძლივი დროის განმავლობაში გროვდება და ჯანმრთელობის სერიოზულ პრობლემებს იწვევს. შესაბამისად, ყოველდღიურად იზრდება მოთხოვნა ნატურალურ მოვლის საშუალებებზე, რომლებიც სინთეტიკური საღებავების, არომატიზატორების თუ სხვა მავნე ხელოვნური ქიმიური დანამატებისაგან თავისუფალია. რუსუდან კბილაშვილის თქმით, სწორედ ასეთი ნატურალური მოვლის საშუალებებს ამზადებს „საპოვნელა“.
სამომავლოდ „საპოვნელა“ გეგმავს, რომ კიდევ უფრო ეკო მეგობრული ბრენდი გახდეს და პროდუქტების შეფუთვის მინიმუმ 80% ეკოლოგიურად უსაფრთხო გახადოს.
„ამას გარდა, გვინდა შესაფუთი მასალების ხელახალი გამოყენება დავნერგოთ პრაქტიკაში და გვსურს, რომ მომხმარებელი „საპოვნელას“ შიდა სამზარეულოში ჩავახედოთ, პროდუქტების დამზადების პროცესი ვასწავლოთ და მსურველებს საჭირო ინგრედიენტების ჩვენთან შეძენის შესაძლებლობა ჰქონდეთ. ვგეგმავთ პროდუქტების ასორტიმენტის გაზრდას და სპა მიმართულების გაძლიერებას“, - აცხადებს რუსუდან კბილაშვილი.