„4,2 %-იანი ეკონომიკური ზრდა ოპტიმისტური პროგნოზია, რაც ეკონომიკის ძალიან სწრაფ აღდგენას ითვალისწინებს. მაშინ როდესაც, ქვეყანაში ვაქცინაცია ჯერ კიდევ არ დაწყებულა და მოსახლეობის დიდი ნაწილი სავარაუდოდ წლის ბოლომდე აცრილი ვერ იქნება, რთული წარმოსადგენია, რომ ამხელა ზრდა გვქონდეს.“ -  ამის შესახებ რადიო „კომერსანტის“ გადაცემა პროფესიონალებში „აისეტის“ კვლევითი  ინსტიტუტის უფროსმა მკვლევარმა დავით კეშელავამ განაცხადა. მისი თქმით, ქვეყანაში არსებული ურთულესი ლოქდაუნის და შეზღუდვების ფონზე რაიმე პროგნოზის გაკეთება რთულია.

„ჩვენ ჯერ არ მოგვიმზადებია დოკუმენტი, სადაც 2021  წლის ზრდის მაჩვენებელი გვექნებოდა, თუმცა პირველადი შეფასებით, 2021 წლის პირველი კვარტლის  პროგნოზი  გვაქვს, რომელიც არის მეტისმეტად ოპტიმისტური. პირველ კვარტალში ეკონომიკურ ვარდნას ველოდებით, რადგან ეს პირველი კვარტალი მოიცავს იანვარს, როდესაც ჩაკეტილი ვიყავით, თებერვალს, როდესაც თითქმის ნახევარი ჩაკეტილი ვიყავით, მარტშიც არ ველოდებით, რომ ეკონომიკა აყვავდება. ამიტომ წლის განმავლობაშიც შესაბამისად ის საპროგნოზო მაჩვენებლები, რომელზეც ბიუჯეტი დავგეგმეთ და რომელზეც  წლის დასაწყისში გვქონდა საუბარი სავარაუდოდ  ნეგატიური  მიმართულებით  გადაიხედება“,  - აღნიშნა დავით კეშელავამ.

კეშელავამ  გადაცემაში  ტურიზმის გახსნაზეც ისაუბრა და  განმარტა, რომ დადებითი პროგნოზი არც ამ მიმართულებით აქვს. მისი თქმით, პირველ რიგში შიდა ტურიზმი და ეკონომიკის გახსნა არის სირთულეებთან დაკავშირებული, ხოლო როდესაც მსოფლიო ჯერ კიდევ პანდემიას ებრძვის ტურისტები სხვა ქვეყანაში მოგზაურობისგან თავს შეიკავებენ.

„ჯერ შიდა ეკონომიკის გახსნა რა სირთულეებთან არის დაკავშირებული, პრაქტიკულად ვერ ვხსნით და გახსნის გეგმა არც უახლოეს მომავალში ჩანს. ტურიზმის გახსნა კიდევ  უფრო  დიდი პრობლემაა, რადგან ეს უკვე ჩვენზე დამოკიდებული აღარ არის, რაც არ უნდა დაასტაბილურო ქვეყანაში  ეკონომიკური მდგომარეობა, როდესაც კორონავირუსი დამარცხებული არ არის, ძალიან ლოგიკურია, რომ ადამიანები სხვა ქვეყანაში ვიზიტს მოერიდებიან. ამიტომ ცოტა არ იყოს გადაჭარბებულად ოპტიმისტურია, რომ 2021 წელს ტურიზმის მნიშვნელოვან აღდგენას ველოდოთ. ვხედავთ, რომ თითქოს რაღაც ნაბიჯები გადაიდგა, მაგრამ შედეგები არ  ჩანს და ლოგიკურია, რომ ამ ეტაპზე ვერც გამოჩნდება, რადგან პანდემიასთან ერთად ტურიზმის არსებობა  საეჭვო საკითხია“ -  აღნიშნა დავით კეშელავამ.