„ჯორჯიან უოთერ ენდ ფაუერiს“ (GWP) 2021 წლის შემოსავალი 178,519 მლნ ლარი იყო. აქედან, ძირითადი 158,833 მლნ ლარის შემოსავალი - წყალმომარაგებიდან და მასთან დაკავშირებული მომსახურებიდან მიიღო, 18,615 მლნ ლარი კი - ელექტროენერგიის რეალიზაციიდან. 2020 წელს კი კომპანიის შემოსავალი შეადგენდა - 116,078 მლნ ლარს, საიდანაც 107,597 მლნ წყალმომარაგებიდან და მასთან დაკავშირებული მომსახურებიდან ჰქონდა მიღებული. ანგარიშგების მიხედვით, კომპანიის შემოსავლის ძირითადი წყარო არის წყლის მიწოდება თბილისის მოსახლეობისა და იურიდიული პირებისათვის.

2021 წლის კომპანიის მოგება 60,013 მლნ ლარს შეადგენდა, მაშინ როცა 2020 წელი კომპანიამ 48,936 მლნ-იანი ზარალით დაასრულა. ამასთან, საანგარიშო პერიოდში კომპანიის საკუთრებაში - 574,666 მლნ ლარის აქტივებს ფლობდა. საანგარიშო პერიოდში GWP-ის კაპიტალი 156,892 მლნ ლარი იყო.

წყალმომარაგებისა და წყალარინების მომსახურებას თბილისისა და მიმდებარე სოფლების მოსახლეობას „ჯორჯიან უოთერ ენდ ფაუერი“ (ჯივიპი) უწევს. კომპანია ასევე ფლობს და ამუშავებს ჰიდროელექტროსადგურებს და გამოიმუშავებს ელექტროენერგიას საკუთარი მოხმარებისთვის და ღია ბაზარზე გასაყიდად.

მიმდინარე წლის დასაწყისში „ჯივიპის“ 80%-იანი წილი ესპანურმა კომპანიამ Aqualia შეიძინა, 20%-იანი წილი კი „საქართველოს კაპიტალის“ საკუთრებაშია. 2021 წლის 31 დეკემბერს საქართველოს კაპიტალმა გამოაცხადა, რომ შუალედური მშობელი კომპანია ყიდდა თავისი სააქციო წილის თავდაპირველ 80%-ს ჯორჯია გლობალ იუთილითიზ-ის კომუნალური წყალმომარაგების ბიზნესში FCC Aqualia-ზე („Aqualia“) ორეტაპიანი გარიგებით. გარიგების პირველ ეტაპზე სს „საქართველოს კაპიტალმა“ გაასხვისა ჯორჯია გლობალ იუთილითიზის კაპიტალის 65%-იანი წილი Aqualia-ზე (რაც წარმოადგენს წყალმომარაგების ბიზნესში 80%-იან ეკონომიკურ მონაწილეობას). გარიგების მეორე ეტაპი შედგება ჯორჯია გლობალ იუთილითიზის მიერ გამოშვებული, არსებული ობლიგაციების 2022 წლის ივლისში დაგეგმილი გამოსყიდვის შემდეგ. გარდა ამისა, Aqualia-მ სს „საქართველოს კაპიტალს“ მიანიჭა ფუთ-ოფციონი, რომლის გამოყენება შესაძლებელია 2025 ან 2026 წელს, ხოლო სს „საქართველოს კაპიტალმა“ Aqualia-ს მიანიჭა ქოლ-ოფციონი, რომელიც გამოყენება შესაძლებელია ფუთ-ოფციონის ვადის ამოწურვისთანავე 2026 წელს და საკუთრივ მას ვადა ეწურება ექვსი თვის შემდეგ, წყალმომარაგების მომსახურების ბიზნესში სს „საქართველოს კაპიტალის“ დარჩენილ 20%-იან წილზე.