დაზოგვა ამა თუ იმ მიზნით ფულის სამომავლოდ შეგროვებაა. დაზოგვის მიზანი შეიძლება სხვადასხვა იყოს: სწავლისთვის თანხის შეგროვება, სახლის ან ავტომობილის შეძენა, გაუთვალისწინებელი ხარჯებისთვის ე.წ. „შავი დღისთვის“ თანხის გადადება და სხვა. დანაზოგის შესაქმნელად სხვადასხვა გზა არსებობს, მათ შორის ერთ-ერთია საბანკო დეპოზიტის გახსნა.
„კომერსანტი“ გთავაზობთ 5 რჩევას, რაც დეპოზიტის გახსნამდე უნდა იცოდეთ:
1. მიზნიდან გამომდინარე, სწორად შეარჩიეთ დეპოზიტის სახე
ყველა დეპოზიტი 2 ძირითად ტიპად იყოფა: ვადიანი ან უვადო დეპოზიტები. ვადიანი დეპოზიტი ეს არის ბანკთან წინასწარ შეთანხმებული ვადით გახსნილი დეპოზიტი, რომელიც ძირითადად უკეთესი პირობებით გამოირცევა, თუმცა მისი გატანა წინასწარ შეთანხმებულ რიცხვშია შესაძლებელი. უვადო ანუ მოთხოვნამდე დეპოზიტის შემთხვევაში კი მისი დასრულების ვადის შეთანხმება წინასწარ არ ხდება, თუმცა ამ შემთხვევაში საპროცენტო სარგებელი შედარებით ნაკლებია.
დეპოზიტის სახეობას წარმოადგენს სადეპოზიტო სერტიფიკატიც - ეს არის ერთგვარი ფასიანი ქაღალდი, რომლითაც ბანკი იღებს ვალდებულებას, სერტიფიკატით განსაზღვრულ დღეს გადაგიხადოთ თქვენ, როგორც სერტიფიკატის მფლობელს წინასწარ განსაზღვრული თანხა.
2. შეადარეთ ერთმანეთს სხვადასხვა ფინანსური ინსტიტუტების მიერ შემოთავაზებული პირობები
ანაბრის გახსნამდე, დააზუსტეთ სხვადასხვა ფინანსური ინსტიტუტების შემოთავაზების შესაძლო ვარიანტები. შეადარეთ ერთმანეთს ანაბართან დაკავშირებული ხარჯების შესაძლო დიაპაზონი, ზოგადი პირობები თუ მოთხოვნები, მოიძიეთ რამდენიმე ალტერნატივა და განაცხადით უკვე იმ ორგანიზაციას მიმართეთ, რომელთა შემოთავაზებები თქვენთვის ყველაზე ხელსაყრელი ჩანს.
3. ეფექტური საპროცენტო განაკვეთი
დეპოზიტების სხვადასხვა ალტერნატივების შედარებისას ყურადღება მიაქციეთ ეფექტურ საპროცენტო განაკვეთს. ეფექტური საპროცენტო განაკვეთი გამოხატავს როგორც დეპოზიტზე დასარიცხი სარგებლის, ისე მასთან დაკავშირებული ყველა ხარჯს თითოეულის მიღებისა თუ გადახდის ვადის გათვალისწინებით. შესაბამისად, ერთნაირი ვადების მქონე ანაბრების შედარებისას ეფექტური საპროცენტო განაკვეთი დაგეხმარებათ თქვენთვის ყველაზე ხელსაყრელი შეთავაზების არჩევაში.
4. დათვალეთ დეზოზიტის გახსნასთან დაკავშირებული ხარჯები
დეპოზიტით სარგებლობას შესაძლოა თან ახლდეს ხარჯებიც. მათ შორის: 1. სადეპოზიტო და/ან დეპოზიტის მომსახურე ანგარიშის გახსნისა და მომსახურების საკომისიო; 2. თანხის ანგარიშიდან გატანის საკომისიო ანუ როდესაც ანაბრის თანხა სადეპოზიტოდან მიმდინარე ანგარიშზე აღმოჩნდება და თქვენ შეგეძლებათ მისი გამოყენება, ამ თანხის განაღდებისთვის შეიძლება დაწესებული იყოს თანხის განაღდების ანუ ანგარიშიდან ნაღდი ფულის გატანის საკომისიო.
5. გაეცანით ხელშეკრულებას
სადეპოზიტო ანგარიშის გახსნისას ბანკი მომხმარებელთან აფორმებს დეპოზიტის ხელშეკრულებას. ბანკი ვალდებულია, ხელშეკრულებაში ასახოს ყველა მნიშვნელოვანი დეტალი, რაც დეპოზიტის მომსახურებას ეხება. დეპოზიტის ხელშეკრულებას სავალდებულოდ უნდა ჰქონდეს თავსართი, სადაც მოცემულია აუცილებელი ინფორმაცია, რომელსაც უნდა გაეცნოთ ხელშეკრულების ხელმოწერამდე. სადეპოზიტო ხელშეკრულება მოიცავს ინფორმაციას, ანაბრის ვადის, საპროცენტო სარგებლის განაკვეთის ოდენობის, სარგებლის დარიცხვის მეთოდისა და პერიოდულობის შესახებ.