თურქეთიდან იაფი მედიკამენტების იმპორტი ხუთი თვის წინ დაიწყო, დღეისათვის კი საქართველოს სააფთიაქო ქსელებში ხელმისაწვდომია თურქეთიდან იმპორტირებული 400-ზე მეტი დასახელების მედიკამენტი. მედიკამენტებზე ფასები 60% − 80%-მდე არის შემცირებული. ჯანდაცვის სამინისტროს სტატისტიკით, მხოლოდ მარტიდან 24 ივნისამდე 155 000-ზე მეტმა მოქალაქემ შეიძინა თურქეთიდან იმპორტირებული მედიკამენტები და ძველი ფასებით, 74 მილიონის ნაცვლად, დაახლოებით, 23 მილიონი ლარი გადაიხადა. შესაბამისად ამ პერიოდში მოქალაქეებმა 51 მლნ ლარი დაზოგეს.
„ფარმაცევტთა ასოციაციის“ აღმასრულებელი დირექტორი ილონა კოკიაშვილი „კომერსანტთან“ თურქეთის ბაზრიდან მედიკამენტების შემოტანის ეფექტზე საუბრობს და ამბობს, რომ 5 თვეში მეზობელი ქვეყნიდან უკვე დაახლოებით 360 ტონა მედიკამენტი შემოვიდა.
„თურქეთის ბაზრის გახსნის შემდეგ რამდენიმე თვე გავიდა, საწყის ეტაპზე იყო სხვადასხვა პრობლემა, მათ შორის ის რომ გაჩნდა მედიკამენტების დეფიციტი, რაც პანიკურმა შესყიდვებმა გამოიწვია. ზოგადად სანამ უწყვეტი მოწოდების ჯაჭვი აეწყობა ამას სჭირდება გარკვეული დრო, მინდა გითხრათ ჩვენს შემთხვევაში საკმაოდ სწრაფად მოხდა ეს. პირველ 5 თვეში თურქეთიდან დაახლოებით 360 ტონა მედიკამენტი შემოვიდა. ქრონიკული მიმართულებით არის დიდი მოთხოვნა, ეს იქნება გულ-სისხლძარღვთა თუ დიაბეტი, მნიშვნელოვანია ის ფაქტიც, რომ საკმაოდ აუცილებელი მედიკამენტებია შემოტანილი. რა პირობებითაც შემოდის სხვა წამლები სხვა ქვეყნებიდან, აბსოლუტურად იგივე ვრცელდება თურქეთთან მიმართებით, ეს კანონი 2009-ში გამოიცა და ახლა უკვე 2022-ში დაემატა მას ისრაელი, ხორვატია და თურქეთი.
რაც შეეხება ფასებს, თურქეთიდან შემოტანილი მედიკამენტების გაძვირება სავარაუდოდ აგვისტოდან მოხდება, რადგან რამდენიმე დღის წინ თურქეთში მიღებული გადაწყვეტილება, რომელიც თურქული მედიკამენტების ფასების ზრდას გულისხმობს, რა თქმა უნდა საქართველოში შემოტანილ პროდუქციაზეც მოახდენს გავლენას და სავარაუდოდ აგვისტოდან ფასები 30%-ით გაიზრდება. თუმცა ის მაინც იაფიან სეგმენტში მოხვდება, რადგან ზოგადად მთელ მსოფლიოში ძვირდება მედიკამენტები, მაგალითად ამერიკაშიც სადაც ისტორიულად მაღალ დონეზეა ინფლაციის მაჩვენებელი“, — აღნიშნავს ილონა კოკიაშვილი.
თურქეთის ფარმაცევტული ბაზარი, პრემიერ-მინისტრ ირაკლი ღარიბაშვილის ინიციატივით, 17 იანვარს გაიხსნა. გარდა ამისა, ხარისხიან მედიკამენტებზე ხელმისაწვდომობის გაზრდის კუთხით ჯანდაცვის სამინისტრო ფარმაცევტულ რეფორმას ახორციელებს. რეფორმის შედეგად, მედიკამენტების რეცეპტი მატერიალური სახით აღარ გაიცემა და ექიმი დანიშნულებას ელექტრონული ფორმით გასცემს. გარდა ამისა, მოსახლეობისთვის მედიკამენტებზე ხელმისაწვდომობის კიდევ უფრო გაზრდის მიზნით, 11 აპრილიდან დაინერგა გენერიკული რეცეპტების სისტემა, რაც ნიშნავს იმას, რომ ექიმი დანიშნულებაში წამლის მხოლოდ გენერიკულ, ანუ საერთაშორისო დასახელებას უთითებს.