თბილისში ძველი, საბჭოთა დროინდელი გაზის მილების ჩანაცვლებისა და რეაბილიტაციის პროცესი აქტიურ გაზაშია. თბილისის იმ უბნებში, სადაც ქსელები თითქმის ამორტიზებული იყო, მილების 60% ჩანაცვლდა. გაზის მილების აღდგენა-რეაბილიტაციის პროცესს ,,თბილისი ენერჯი“ 5-წლიანი გეგმის ფარგლებში ახორციელებს. კომპანიის ტექნიკური დირექტორის მოადგილის გიორგი ლეფსვერიძის ინფორმაციით, გეგმის მიხედვით, 2025 წლის ბოლოს გამოუსადეგარი ძველი მილების  95% სრულად შეიცვლება.

,,ძველი, საბჭოთა პერიოდის გაზის მილების  აღდგენა-რეაბილიტაციის ააქტიური სამუშაოები მიმდინარეობს. მაქსიმალურ გამოვიყენეთ გაზაფხული-ზაფხული და რეაბილიტაციის პროცესს ახლაც ვაგრძელებთ.  მაგალითისთვის,  სულ ახლახან დასრულდა  ნაძალადევის რაიონში, მანჯგალაძის ქუჩაზე ბუნებრივი აირის მილების სრული რეაბილიტაცია.  იმერეთის ქუჩაზე და მიმდებარე ქუჩებზეც სამუშაოები ახლაც მიმდინარეობს. სრულად შეიცვალა კომუნისტების დროს ჩაყრილი მილები, ქსელი ამორტიზებული იყო.  ,,თბილისი ენერჯიმ“ აღნიშნულ ქუჩებზე  ახალი ქსელები და მრიცხველები დაამონტაჟა. ამით დასრულდება სრულიად ნაძალადევის რაიონის რეაბილიტაცია, რაშიც კოლოსალური შრომა და რესურსი ჩაიდო. ნაძალადევის რაიონში არის 14 700 ოჯახი, რომელსაც გაზი უკვე  ახალი მილებით მიეწოდება. ჩვენ გვაქვს გაწერილი მომავალი 5 წლის გეგმა, რომლითაც ,,თბილისი ენერჯის“ მიერ შესწავლილი ძლიერ ამორტიზებული მილების 95% შეიცვლება“, - ამბობს ,,კომერსანტთან“ გიორგი ლეფსვერიძე.

მისვე ინფორმაციით, გარდა იმისა, რომ მილები იცვლება, მონტაჟდება თანამედროვე აღრიცხვის ხელსაწყოები და მრიცხველები, რამაც მომსახურება მნიშვნელოვნად გააუმჯობესა.

,,ათეული მილიონობით ლარია დახარჯული, არა მარტო მილები, აღრიცხვის ხელსაწყოები და  გამანაწილებლებიც შევცვალეთ, ასევე მარეგულირებელი პუნქტები და სხვა, რაც ძალიან ძვირია. ამით უმჯობესდება თითოეული თბილისისთვის მიწოდებული გაზის წნევა და ხარისხი. სარეაბილიტაციო სამუშაოები ჩატარებულია არა მარტო ცენტრალურ, არამედ შიდა კვარტალური და შიდა ქუჩების მილებიც შეიცვალა.  ამ მხრივ მძიმე მდგომარეობა იყო ნაძალადევში,  წყნეთში,  მთაწმინდაზე, ჭავჭავაძის გამზირსა და ვაკის რამდენიმე ქუჩაზეც. გლდანი ამ მხრივ ყველაზე კარგი უბანია, რადგან შედარებით გვიან გაზიფიცირდა, 2000-იან წლებში, თან მიწისზედა ქსელი გვაქვს, ადვილად არ იჟანგება და კოროზია არ ედება“, - ამბობს გიორგი ლეფსვერიძე.

გაზის მილების უსაფრთხოებასთან დაკავშირები ბოლო წლებში აქტიური მსჯელობა მიმდინარეობს. როგორც სპეციალისტები განმარტავენ, გაზის მილების საექსპლუატაციო ვადა 30 წელია, ესეც იმ შემთხვევაში, თუ ელექტროქიმიური დაცვაც აქვს, ნიადაგი ნეიტრალურია და არც მოხეტიალე დენი შეიმჩნევა.

რეალურად თბილისში სამივე შემთხვევასთან გვაქვს საქმე.

მარი ჩიტაია