ინვესტიციის განხორციელება კარგი გადაწყვეტილებაა იმისათვის, რომ შემოსავლის წყარო გაგიჩნდეთ, პენსიაზე გასვლის შემდეგ გქონდეთ ფინანსები ან, თუნდაც, გამოხვიდეთ ფინანსური კრიზისიდან. მაგრამ ინვესტიციის მომგებიანად განხორციელება საკმაოდ რთული საქმეა. ამ ამოცანის გამარტივება დროში გამოცდილ, კარგ საინვესტიციო სტრატეგიას შეუძლია, რომელიც შეამცირებს რისკებს და კარგ ანაზღაურებასაც მოიტანს.

შემოგთავაზებთ ხუთ ყველაზე პოპულარულ საინვესტიციო სტრატეგიას, თავისი უპირატესობებითა და შესაძლო რისკებით.

• იყიდეთ და დაიტოვეთ

ეს კლასიკური სტრატეგიაა. იდეალურ შემთხვევაში, შეძენილ აქციებს არასოდეს ყიდით ან მას მინიმუმ 3-დან 5 წლამდე დროით იტოვებთ.

უპირატესობა: არ მონაწილეობთ აქტიურ ვაჭრობაში, რაც ხშირად შემოსავლების შემცირების რისკს ზრდის. არ მოგიწევთ ტრეიდერების მსგავსად ბაზარზე მუდმივად მიჯაჭვულობა. თუ აქციებს არ გაყიდით, აღარ მოგიწევთ იმაზე ფიქრი, როდის და რა ფასად გაყიდოთ და თავიდან აიცილებთ კაპიტალზე მოგების გადასახადსაც.

რისკი: ეს სტრატეგია გაამართლებს, თუ აქციების გაყიდვის ცდუნებას გაუძლებთ, იმ შემთხვევაშიც კი, თუ ბაზარზე სიტუაცია გაუარესდება, თუნდაც, ვარდნა 50%-იანი იყოს.

• შეიძინეთ საფონდო ინდექსი

ეს სტრატეგია მიმზიდველი საფონდო ინდექსის შეძენას გულისხმობს. საინვესტიციოდ ყველაზე პოპულარული ინდექსებია Standard & Poor’s 500 და Nasdaq Composite.

უპირატესობა: საფონდო ინდექსის შეძენით ყიდულობთ დივერსიფიცირებულ პორტფელს, რომელიც, ცალკეული კომპანიის აქციებთან შედარებით, ნაკლებად რისკიანია.

რისკი: დივერსიფიცირებული პორტფელის ყიდვა ყოველწლიურად საშუალოდ 10%-იან სარგებელს მოგიტანთ, მაგრამ არა ყველაზე მაღალ წლიურ პროცენტს.

• საფონდო ინდექსი და ცოტა მეტი

ამ სტრატეგიით ყიდულობთ საფონდო ინდექსს და კიდევ რამდენიმე აქციას. მაგალითად, თანხის 94%-ს აბანდებთ საფონდო ინდექსში და დანარჩენი 3-3%-ით ყიდულობთ Apple-ისა და Amazon-ის აქციებს. ეს კარგი ვარიანტია დამწყები ინვესტორისთვის.

უპირატესობა: დაბალი რისკი, ნაკლები სამუშაო და საკმაოდ კარგი შემოსავალი.

რისკი: თუ ცალკეულ აქციას პორტფელში შედარებით მცირე წილი უკავია, რისკები ნაკლებია, ისევე, როგორც საფონდო ინდექსის შეძენისას. თუ პორტფელში ინდივიდუალური აქციების წილი დიდი არ არის, ეს ინვესტიცია საშუალო საბაზრო ანაზღაურებას მოიტანს. გასათვალისწინებელია, რომ ცალკეული აქციების შერჩევამდე, ინვესტიციის განხორციელებამდე ანალიზის ჩატარება დაგჭირდებათ, რაც მეტ ძალისხმევას მოითხოვს.   

• ინვესტიცია შემოსავლებში

ამ დროს ინვესტირება ხდება დივიდენდის გადამხდელ აქციებსა და ობლიგაციებში. ანაზღაურების ნაწილს ინვესტორი ნაღდი ფულის სახით იღებს, რომლის რეინვესტირება შეუძლია განახორციელოს მეტ აქციებსა და ობლიგაციებში. შემოსავლის ნაწილს კი ინვესტორი ობლიგაციებიდან მიღებული პროცენტის სახით იღებს.

უპირატესობა: ასეთი ინვესტიცია საშუალებას იძლევა, უსაფრთხოდ მიიღოთ რეგულარული ფულადი შემოსავალი. როცა საფონდო ბაზარი ეცემა, ინვესტორები უსაფრთხოდ არიან, რადგან მათი აქტივები ისეთ სექტორებშია, როგორიცაა უძრავი ქონება და კომუნალური მომსახურება. როგორც წესი, ანაზღაურება დროთა განმავლობაში იზრდება ზედმეტი ძალისხმევის გარეშე.

რისკი: მიუხედავად იმისა, რომ რისკი უფრო დაბალია, ვიდრე აქციებში ინვესტირებისას, ისიც შეიძლება დაეცეს. ინვესტირება ზოგიერთი სახის ობლიგაციებში, დაბალი ანაზღაურების გამო, არამიმზიდველი შეიძლება იყოს. არის შემთხვევები, როცა შემოსავალი ინფლაციას ვერ ფარავს.

• დოლარის საშუალო ღირებულება

გულისხმობს ფიქსირებული თანხის ინვესტირებას რეგულარულად ხანგრძლივი დროის განმავლობაში. სტრატეგია მარტივია და მცირე ინვესტიციით კარგი შედეგების მიღება  შეუძლია. მაგალითად, შეგიძლიათ თვეში $500-ის ინვესტიცია განახორციელოთ, იმის მიუხედავად, ბაზარი მზარდია თუ ვარდნას განიცდის. ან შეგიძლიათ, ყოველ კვირას $125 დაამატოთ ინვესტიციას. შესაბამისად, ყოველთვიურად შეძენილი აქციების რაოდენობა განსხვავებულია. როდესაც აქციების ღირებულება იზრდება, თქვენი ფული ნაკლებ აქციას ყიდულობს. ხოლო როცა აქციის ფასი შემცირდება, თქვენი ფულით მეტი აქცია მოგივათ.

უპირატესობა: თავიდან აიცილებთ მთელი თქვენი ფულის ერთდროულად დაკარგვის რისკს. განსაზღვრული დროის შემდეგ პორტფელის მოცულობა, სავარაუდოდ, გაიზრდება, თუნდაც მხოლოდ დისციპლინირებული მიდგომის გამო, რაც რეგულარულ ინვესტირებას უკავშირდება.

რისკი: მიუხედავად იმისა, რომ ეს სტრატეგია თავიდან აგაცილებთ ძალიან მაღალი ფასის გადახდას, ის ასევე ხელს შეგიშლით, იყიდოთ დაბალ ფასად. ასევე, ნაკლებად სავარაუდოა, რომ ინვესტიციამ მაღალი ანაზღაურება მოიტანოს.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე როგორც მოგება. თქვენს მიერ დეტალურად უნდა იქნეს გაანალიზებული, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.

წყარო: businessfeed.ge