„სოთბისის“ აუქციონზე 555.55-კარატიანი შავი ბრილიანტი, „ენიგმა“ გაიყიდება. ვაჭრობა 3 თებერვალს, წყნარი ოკეანის სტანდარტული დროით, დილის 6 საათზე (გრინვიჩის დროით 14:00-ზე) დაიწყება და 9 თებერვალს დასრულდება. გადახდის საშუალებებს შორის, კრიპტო ვალუტებიც მიიღება.
„სოთბისი“ აცხადებს, რომ ეს არის უდიდესი დაწახნაგებული შავი ბრილიანტი მათ შორის, რომლებიც ოდესმე აუქციონზე გასულა. 2006 წელს „ენიგმა“ გინესის მსოფლიო რეკორდების წიგნში შევიდა.
მეცნიერების ნაწილი ვარაუდობს, რომ ბრილიანტი, რომელსაც ასევე კარბონატულ ბრილიანტსაც (კარბონადოს) უწოდებენ, ჩვენს პლანეტაზე გარესამყაროდან მოხვდა. აქამდე ამ სახის ალმასებს მხოლოდ ბრაზილიაში და სამხრეთ აფრიკის რესპუბლიკაში პოულობენ.
„ასეთი ალმასების წარმომავლობა და წარმოქმნა იდუმალებით არის მოცული. ისინი ჩვენს პლანეტაზე ძალიან ცოტაა“, - „როიტერთან“ საუბრისას ამბობს გეოლოგი აარონ ცელესტიანი.
მისივე თქმით, კარბონატული ბრილიანტების უმეტესობა, 2.6-3.2 მილიარდი წლისაა. შედარებისთვის, დედამიწის ასაკად 4.65 მილიარდი წელია მიჩნეული. სავარაუდოდ, კარბონადოები მაშინ წარმოიქმნა, როდესაც დედამიწის ფირფიტები ჯერაც გადაადგილდებოდა და ატმოსფეროს ჟანგბადით გაჯერება მიმდინარეობდა.
„ჩვენ ვფიქრობთ, კარბონადოები დედამიწის წიაღში, ძალიან დიდ სიღრმეზე წარმოიქმნა, იმაზე გაცილებით დიდ სიღრმეზე, ვიდრე ჩვეულებრივი ალმასები. არსებობს ჰიპოთეზა, რომლის შესაბამისადაც, შავი ალმასები იმ ადგილებში შეიძლება წარმოქმნილიყო, სადაც ჩვენს პლანეტაზე დიდი ზომის ასტეროიდები დაეცა. სხვა ჰიპოთეზის მიხედვით, ასეთი ალმასები კოსმოსში წარმოიქმნა და ჩვენთან იქიდან ჩამოვარდა“, - ამბობს ცელესტიანი.
„ენიგმა“ საზოგადოებისთვის ადრე არასდროს უჩვენებიათ. მისი აღმოჩენის ისტორია უცნობია. სავარაუდოდ, ის 4-7 მილიონი დოლარის ფარგლებში გაიყიდება. აუქციონზე გატანამდე, ის პირველად დუბაიში გამოფინეს, ამ კვირაში კი უკვე ბევერლი ჰილზში გამოიტანეს. მალე მას ლონდონში წაიღებენ, სადაც აუქციონი გაიმართება.
BPN.GE