„მაღალი ინფლაცია იმდენად დიდ პრობლემას შექმნის, რომ შეიძლება სოციალურ უკმაყოფილებამდეც მივიდეს საქმე“

მსოფლიო ბანკი წელს საქართველოს ეკონომიკის 5.5%-იან ზრდას პროგნოზირებს. უფრო ოპტიმისტური პროგნოზი აქვს მთავრობას, ფინანსთა მინისტრის პირველი მოადგილე, გიორგი კაკაურიძე აღნიშნავს, რომ მიმდინარე წლის ეკონომიკური ზრდის მაჩვენებელი 6%-ზეა დაგეგმილი. პარლამენტის საბიუჯეტო ოფისის ინფორმაციით კი 2022 წელს საქართველოს ეკონომიკის საშუალო ზრდა 6.7%-ც კი იქნება.

ადგილობრივი საინვესტიციო კომპანიები საქართველოს ეკონომიკური ზრდის პროგნოზს უფრო მეტად აუმჯობესებენ. ეკონომიკის ზრდის პროგნოზი გაზარდა Galt&Taggart-მა, საინვესტიციო ბანკი წელს ქვეყანაში ეკონომიკის 7.6%-იან ზრდას ელის, მანამდე ნავარაუდევი 4.5%-ის ნაცვლად. „თიბისი კაპიტალს“ კი უკვე 8%-იანი ზრდის მოლოდინი აქვს.

საქართველოს ეკონომიკა რომ „დუღს“, ამაზე პრემიერ-მინისტრი ხშირად საუბრობს, ამას მუდმივად გვახსენებს მთავრობაც და ოფიციალური სტატისტიკაც, თუმცა ფაქტია, რომ რეალურად მოსახლეობის ჯიბეზე ეს მაჩვენებელი არ აისახა. რამდენად რეალურია ადგილობრივი თუ საერთაშორისო ორგანიზაციების პროგნოზები და რას ნიშნავს მოსახლეობისთვის მაღალი ინფლაციის ფონზე ასეთი მაჩვენებელი, ამ თემაზე „კომერსანტს“ ეკონომიკის ექსპერტი ნიკა შენგელია ესაუბრა. მისი თქმით, წელს ეკონომიკური ზრდა 5-6%-ის ფარგლებში იქნება.

„ეკონომიკური ზრდის პროგნოზი 5-6%-ის ფარგლებში იქნება თუ ისევ რამე განსაკუთრებული არ მოხდა. რუსეთიდან შემოსული კომპანიები ამ პროცესში აქტიურად მიიღებენ მონაწილეობას, მათ შორის, IT კომპანიები, რომლებიც ვერ ახდენენ ოპერირებას თავიანთ ქვეყანაში, ამიტომ ფირმები დაარეგისტრირეს საქართველოში, რაც მშპ-ზეც გარკვეულ გავლენას ახდენს და აისახება. ამდენად, ჯამურად ეკონომიკური ზრდა მეტიც შეიძლება იყოს, თუმცა როგორ აისახება ეს საქართველოს მოსახლეობაზე, ეს უკვე სხვა საკითხია.

ხშირად მანიპულირებენ იმით, რომ ექსპორტი იზრდება, მაგრამ ეს მხოლოდ რეექსპორტის ხარჯზე ხდება, რადგან წარმოება არ გვაქვს და საკუთარი პროდუქტი, იშვიათი გამონაკლისის გარდა, ვერ გაგვაქვს. ასეთ ფონზე ეკონომიკური ზრდა რეალურად მხოლოდ ციფრებია და ამ მაჩვენებელს სინამდვილეში ვერავინ იგრძნობს, პირიქით, მაღალი ინფლაცია იმდენად დიდ პრობლემას შექმნის, რომ შეიძლება სოციალურ უკმაყოფილებამდეც მივიდეს საქმე“, - აცხადებს ნიკა შენგელია.

6%, 7% თუ 8% - რამდენით გაიზრდება რეალურად საქართველოს ეკონომიკა 2022 წელს, ეს ბევრ  შიდა და გარე ფაქტორზეა დამოკიდებული, თუმცა სპეციალისტების განმარტებით, მოსახლეობამ რეალურად „ჯიბეზე რომ იგრძნოს“ ეს, ჩვენი ზომის ქვეყნისთვის ორნიშნა ეკონომიკური ზრდა არის საჭირო.