ეროვნული გალერა მასში დაცული ხელოვნების ნიმუშების უსაფრთხოების უზრუნველსაყოფად 36 ახალ სათვალთვალო კამერას ყიდულობს - მიზეზი გასულ კვირაში ჩატარებული საპროტესტო აქციებია, რომლის დროსაც გალერეას თავი შეაფარეს დემონსტრანტების ნაწილმა. ეროვნული მუზეუმი, რომელიც შესყიდვას პირდაპირი წესით, დაჩქარებული წესით აპირებს, განმარტავს, რომ ამ დროს არსებული კამერების ნაწილი დაზიანდა, მათ კი, რომლებიც დაზიანებას გადაურჩა, კარგად ვერ ასახეს შენობაში შემსვლელი ადამიანების გამოსახულება. ეროვნულ გალერეაში 2010 წლიდან ამ დრომდე დამონტაჟებული სამეთვალყურეო სისტემა სულ 6 გარე კამერას აერთიანდებდა, რომელიც, ეროვნული მუზეუმის გენერალური დირექტორის პირველი მოადგილის, ნიკა ახალბედაშვილის განმარტებით, დღეის მდგომარეობით ვერ აკმაყოფილებს თანამედროვე მოთხოვნებს.
ქ. თბილისში რუსთაველის გამზირზე მიმდინარე საპროტესტო აქციების პროცესში აქციის მონაწილეების მიერ შეგნებულად დაზიანდა და აღდგენას აღარ ექვემდებარება დიმიტრი შევარდნაძის სახ. ეროვნული გალერიაზე ჭანტურიას ქუჩის მხარეს განთავსებული გარე პერიმეტრის სამეთვალყურეო კამერა, რაც აღბეჭდილია გალერიის შენობის შიდა და გარე სამეთვალყურეო კამერების მეშვეობით, ამასთანავე ადგილი ჰქონდა ეროვნული გალერეის დახურულ სივრცეში (საგამოფენო დარბაზებში) აქციის მონაწილეთა შემოჭრის ფაქტს. კამერების ჩანაწერები ნაკლებად ხილულია მისი დაბალი ხარისხის გამო, ხოლო მათი რაოდენობრივი სიმცირის გამო ვერ ხორციელდება პერიმეტრის სრული და სათანადო თვალთვალი. რაც აუცილებელია ეროვნული გალერეისა და მასში დაცული ხელოვნების ნიმუშების უსაფრთხოების უზრუნველსაყოფად.
აღნიშნული მოწყობილობების გამართული მუშაობა წარმოადგენს სახელმწიფო კულტურული მემკვიდრეობის, ხელოვნების ნიმუშების უსაფრთხოებისა და დაცვის საგანს, ვინაიდან მათი გაუმართავი მუშაობით შესაძლოა მოხდეს მუზეუმის შენობის, მისი პერიმეტრის, საგამოფენო სივრცეებსა და მათში განთავსებული კულტურული მემკვიდრეობის ნიმუშების, მატერიალურ-ტექნიკური ნივთების დაზიანება, ქურდობა, ყაჩაღობა, განზრახ განადგურება და სხვა კანონსაწინააღმდეგო ქმედება. - ასე ასაბუთებს ეროვნული მუზეუმი 36 კამერის შესყიდვის აუცილებლობას.
36 ახალი კამერის შესყიდვა და მონტაჟი ბიუჯეტს 7 990 ლარი დაუჯდება.