6 მარტს გორელებს ლაშა ღლონტის კონცერტი 3750 ლარი უჯდებათ. როგორც სახელმწიფო შესყიდვების საიტზე განთავსებული ინფორმაციიდან ირკვევა, „დედის და ქალთა დღისადმი მიძღვნილი ღონისძიების ფარგლებში კონცერტი ჩატარება პოპულარული მომღერლის ლაშა ღლონტის მონაწილეობით“ და ამ მიზნით გორის მუნიციპალიტეტის მერია გამარტივებული შესყიდვით „პოპულარული მომღერლის ლაშა ღლონტის გასართობი მომსახურების შესყიდვას“ აპირებს.
როგორც სახელმწიფო შესყიდვების საიტიდან ვიგებთ, ღონისძიებების სპეციფიკიდან გამომდინარე, დაგეგმილი აქტივობა საავტორო ნამუშევრებს წარმოადგენს. აქტივობების მიმდინარეობის პარალელურად, იკვეთება კვალიფიციურ შემსრულებლებთან თანამშრომლობის საკითხები, რაც თავის მხრივ, დროში შეზღუდვას იწვევს, გასათვალისწინებელია მრავალი ფაქტორი, რათა მომღერალს შეეძლო ღონისძიებაში მონაწილეობის მიღება. ღონისძიების ორგანიზატორთა ჯგუფი აწარმოებდა მოლაპარაკებებს შემსრულებლებთან, რომ გაეგოთ მათი გეგმა-გრაფიკი სადღესასწაულო თარიღებთან დაკავშირებით. აქედან გამომდინარე მიეღოთ გადაწყვეტილება თუ ვინ მოეწვიათ სადღესასწაულო კონცერტზე.
აღნიშნულიდან გამომდინარე, შეუძლებელი იყო შესყიდვის წინასწარ დაგეგმვა.
თუმცა მანამდე, 1-ელ მარტს ლაშა ღლონტი კონცერტს ჩაატარებს ლანჩხუთის მუნიციპალიტეტში, რისთვიაც მომღერალს ლანჩხუთის ბიუჯეტიდან, ასევე გამარტივებული შესყიდვით 5000 ლარს გადაუხდიან.