საქართველოში ალკოჰოლური სასმელების ერთ-ერთმა უმსხვილესმა მწარმოებელმა სს „სარაჯიშვილმა“ 2021 წლის 6 თვეში - 5,5 მლნ ლარის წმინდა მოგება მიიღო, ხოლო წმინდა მოგებამ 5,5 მლნ ლარი შეადგინა. კომპანიის ნახევარწლიურ კონსოლიდირებულ ანგარიშში ვკითხულობთ, რომ 2020 წლის 6 თვის პერიოდთან შედარებით წმინდა მოგება 4.2-ჯერ, ხოლო საერთო მოგება 1.7-ჯერ გაიზარდა.
2021 წელს 6 თვეში სს „სარაჯიშვილის“ მიერ რეალიზებული პროდუქციის ღირებულებამ 19,7 მლნ. ლარი შეადგინა. ეს მაჩვენებელი 2020 წლის 6 თვის გაყიდვებს 74%-ით აღემატება. გაყიდვები ძირითადად საექსპორტო ბაზრებზე მოდიოდა. 2021 წლის 6 თვის გაყიდვებში 20% ადგილობრივ, ხოლო 80% საექსპორტო ბაზრებს ეკავა.
საანგარიშო პერიოდში კომპანიის პროდუქცია 24 საექსპორტო ქვეყანაში იყო წარმოდგენილი, თუმცა კომპანიის მთავარი საექსპორტო ბაზარი რუსეთია, სადაც „სარაჯიშვილმა“ ₾ 7.9 მლნ. ღირებულების პროდუქცია გაყიდა. მას მოსდევს ბელარუსი ₾ 3.4 მლნ., შემდეგ უკრაინა ₾ 2.5 მლნ. ყაზახეთი ₾ 0,3 და პოლონეთი ₾ 0.2 მლნ. ჯამში ამონაგებმა ექსპორტიდან 15,7 მლნ. შეადგინა, ხოლო ადგილობრივ ბაზარზე კომპანიამ ₾ 3,9 მლნ-ს ალკოჰოლური სასმელების რეალიზაცია შეძლო.
მომზადებულ დოკუმენტში ვკითხულობთ, იმ ქვეყნებში სადაც კომპანიას ბოლო წლების განმავლობაში პროდუქცია გააქვს ეკონომიკური მდგომარეობა არ იყო მდგრადი. ადგილი ჰქონდა მთლიანი შიდა პროდუქტის ზრდის მკვეთრ ცვლილებებს, ეროვნული ვალუტების დევალვაციას, ინფლაციას, უმუშევრობის დონის მერყეობას და ა.შ. ანგარიშში ნათქვამია, რომ მათი ეკონომიკური მდგომარეობის გაუარესება მკვეთრად აისახება ს.ს. „სარაჯიშვილის“ გაყიდვების დინამიკაზე. ირკვევა, რომ ამ გარე ფაქტორის თავიდან ასაცილებლად კომპანია მუდმივად მუშაობს დივერსიფიცირების მიმართულებით, რაც ახალი ბაზრების მოძიებაში მდგომარეობს.
საანგარიშო პერიოდის განმავლობაში კომპანიის სასესხო ვალდებულებები 6.1 მლნ. ლარით შემცირდა. ანგარიშში ვკითხულობთ, რომ სასესხო ვალდებულებების შემცირება განპირობებული იყო თავისუფალი ფულადი სახსრების მობილიზებით.
2021 წლის 6 თვის პერიოდში კომპანიაში დასაქმებულთა საშუალო მაჩვენებელმა 127 ადამიანი შეადგინა.
სს სარაჯიშვილი 1994 წელს დაარსდა. კომპანიის ძირითად საქმიანობას წარმოადგენს ალკოჰოლური სასმელების წარმოება და რეალიზაცია როგორც ადგილობრივ, ასევე საერთაშორისო ბაზარზე. კომპანიის წილის 49.6 %-ს მარინა მალაზონია ფლობს, 30 %-ს ზურაბ ბუბუტეიშვილი, 19.8 %-ს გიორგი ბუბუტეიშვილი, ხოლო 0.6 %-ს სხვა აქციონერები ინაწილებენ.
ბაჩო ადამია
სარაჯიშვილი
