უკვე ექვსი წელია საქართველოს მოქალაქეებს ევროკავშირის, შენგენის ზონის ქვეყნებში უვიზოდ მოგზაურობა შეუძლიათ.

ამ ხნის განმავლობაში საქართველოს ასობით ათასმა მოქალაქემ ევროპაში 2 მილიონამდე ვიზიტი განახორციელა.

უვიზო რეჟიმი 2017 წლის 28 მარტის დადგომისთანავე შევიდა ძალაში. შედეგად, საქართველოს მოქალაქეებმა შეძლეს, ევროკავშირის 22 წევრ, 4 არაწევრ და შენგენის 4 კანდიდატ ქვეყანაში უვიზოდ მიმოსვლა 180 დღიდან 90 დღის განმავლობაში. ამასთან, საქართველო 61-ე ქვეყანაა, რომლის მოქალაქეებსაც შენგენის ზონაში უვიზოდ მოგზაურობის შესაძლებლობა მიეცათ.
ამ მნიშვნელოვან თარიღთან დაკავშირებით, მთავრობა დღეს რატომღაც დუმილს ინარჩუნებს. ერთადერთი უწყება, რომელიც განცხადებით გამოეხმაურა ამ თარიღს იუსტიციის სამინისტრო იყო.

ამ 6 წლის განმავლობაში, არაერთხელ იყო საუბარი, რომ შესაძლოა საქართველოს მოქალაქეებისთვის უვიზო მიმოსვლის შეჩერების მექანიზმი ამოქმედებულიყო, ამას ძირითადად საფრანგეთი და გერმანია ითხოვდნენ თავშესაფრის მაძიებელთა დიდი რაოდენობის გამო, თუმცა, ეს თემა ევროსტრუქტურებში განხილვების სტადიას არ გასცდენია.

მხოლოდ ბოლო 8 წლის მანძილზე, ევროკავშირში თავშესაფარი საქართველოს 111 528-მა მოქალაქემ მოითხოვა. ანუ 33 ადამიანში ერთმა. 2022 წელს საქართველოს მოსახლეობა 3 700 000-ზე ოდნავ ნაკლები იყო. ევროკავშირის სტატისტიკის სამსახურის, ევროსტატის მონაცემებით, სულ 2014 წლიდან მოყოლებული საქართველოდან 126 770 თავშესაფრის მოთხოვნა დარეგისტრირდა. ეს რიცხვი მოიცავს მათაც, ვინც ევროკავშირსა და შვეიცარიაში ლტოლვილად ჩაბარებას ხელმეორედ ეცადა.