დედაქალაქში ბუნებრივი აირის მიმწოდებელმა „თბილისი ენერჯიმ“, 2021 წლის ფინანსური ანგარიში გამოაქვეყნა, რომლის მიხედვითაც კომპანიის მოგება გასულ წელს 64.5 მილიონი ლარი იყო.
გაზრდილია კომპანიის შემოსავალიც და 2020 წელს თუ „თბილისი ენერჯის“ შემოსავალი 302 მილიონი ლარი იყო, გასულ წელს, სატარიფო ცვლილებებისა და გაზრდილი მოხმარების გამო 363.3 მილიონ ლარამდე გაიზარდა.
გასული წლის განმავლობაში კომპანიამ სულ 674 მილიონი კუბური მეტრი ბუნებრივი აირი გაყიდა, რაც წინა წელთან შედარებით 9%-ით მეტი იყო.
კომპანია 2021 წელს 498,322 საყოფაცხოვრებო და 19,577 არასაყოფაცხოვრებო აბონენტს ემსახურებოდა. კომპანიის აბონენტების საერთო რაოდენობა ბოლო 4 წლის განმავლობაში 13.71%-ით გაიზარდა.
დოკუმენტის მიხედვით, „თბილისი ენერჯისთვის” უმთავრეს ხარჯს ბუნებრივი აირის შესყიდვა წარმოადგენს, რაშიც კომპანიამ 2021 წელს 244.3 მილიონი ლარი გადაიხადა. შემდეგ ადგილზეა თანამშრომელთა ხელფასები, რაზეც „თბილისი ენერჯიმ” 24 მილიონი ლარი დახარჯა, კომპანიის ცვეთის და ამორტიზაციის ხარჯი 11 მილიონი, გაზის ტრანსპორტირების საფასური კი 13 მილიონი ლარი იყო.
რაც შეეხება მიმდინარე წლის გეგმებს, კომპანია 14 საინვესტიციო პროექტის განხორციელებას და 10 000 მრიცხველის გარეთ გატანას გეგმავს.
„კომპანია მიზნად ისახავს 23,2 მლნ ლარის ინვესტიციის განხორციელებას. ეს ინვესტიციები მოხმარდება ამორტიზებული მილსადენების რეაბილიტაციას და ამ სამუშაოებისთვის საჭირო მანქანა-დანადგარებისა და ინვენტარის შეძენას. ასევე გაგრძელდება მრიცხველების გარეთ გამოტანის პროცესიც. 2022 წელს დაგეგმილია 14 საინვესტიციო პროექტის განხორციელება, რომელიც მოიცავს გაზსადენების სარეაბილიტაციო/სარეკონსტრუქციო და ახალი ქსელების სამშენებლო სამუშაოებს.
მიმდინარე წელს გეგმიური რევიზიის ჩატარება კვლავინდებურად დაიწყება იმ მომხმარებელთა გადამოწმებით, რომელთაც 2020-21 წლებში უფიქსირდებოდათ რაიმე ტიპის დარღვევა. 2022 წელს, იგეგმება 498,829 მომხმარებლის შემოწმება“, — აღნიშნულია ანგარიშში.
კომპანიის ჯამური აქტივები 217 მილიონ ლარს შეადგენს. კომპანიის აქციონერები ბიზნესმენი ხვიჩა მაქაცარია და Neqsol ჯგუფის დამფუძნებელი, ნასიბ ჰასანოვი არიან.