სამშენებლო მასალების გაძვირების ფონზე მთავრობამ სახელმწიფო ტენდერებში მონაწილე ინფრასტრუქტურული კომპანიებისთვის ფასების ინდექსაციის სისტემის ამოქმედების გადაწყვეტილება მიიღო. ახალი სისტემა ადგენს კონკრეტულ ზღვრებს, რა ოდენობის თანხას აუნაზღაურებს კომპანიებს. დოკუმენტის თანახმად, ფასთა ინდექსაცია შეეხება სამუშაოების ღირებულების მაქსიმუმ 70%-ს, უშუალოდ ასანაზღაურებელი თანხა კი ამ დადგენილი ზღვრის 10%-ს არ უნდა აღემატებოდეს.

სამშენებლო კომპანია „ინსის“დირექტორი ზვიად თოიძე ამბობს, რომ გაძვირებული სამშენებლო მასალების ფონზე ინდექსაციის ამოქმედება ძალიან მნიშვნელოვანია, თუმცა ამას დროებითი სახე არ უნდა ჰქონდეს.

„ძალიან კარგი ინიციატივაა, თუმცა ინდექსი ერთჯერადი არ უნდა იყოს, მას რეფორმის სახე უნდა ჰქონდეს, რადგან სამშენებლო ბიზნესს სრული რეფორმა სჭირდება და ეს ამის ერთ-ერთი ნაწილია. გარდა ამისა, სინამდვილეში კომპენსაცია 10%-ის ნაცვლად 7% გამოდის, რადგან კონტრაქტის ღირებულების 70%-ის ინდექსაცია ხდება, ხოლო კომპენსაცია ამ 70%–ის 10%–ს ეხება, რაც განსაზღვრული მიზნის მიღწევას ვერ დაეხმარება. 7%-იანი ჩამკეტი ინდექსაციის დრო არასაკმარისია და მსოფლიოში მსგავსი პროგრამები ზედა ზღვარის გარეშე ხორციელდება, ამასთან დაკავშირებით გვქონდა შენიშვნები, თუმცა გათვალისწინება ვერ მოხერხდა. ეს ვერ შეუწყობს ხელს მთავარ მიზანს, სამშენებლო კომპანიების მიერ მშენებლობების დასრულებას. ფასები მუდმივად მზარდია, შესაბამისად, ფიზიკურად არ ეყოფათ კომპანიებს რესურსი განახორციელონ პროექტები. დღეს როცა ლარის კურსი შედარებით დასტაბილურებულია, შეიძლება არ წარმოადგენდეს ჩამკეტი პრობლემას, მაგრამ ჩვენ არ ვიცით ოქტომბერში რა იქნება, ამიტომ ჩამკეტი არასწორია.

ინდექსი, სამ კომპონენტს მოიცავს: მასალებისა და საწვავის ფასი და ხელფასი. ამიტომ, საქსტატს გარკვეული პერიოდი სჭირდება მის შესამუშავებლად, შესაბამისად საუბარია რომ ოქტომბრამდე ეს ინდექსი არ იქნება. ოქტომბრიდან დაიწყება ათვლა და შეეხება იმ პროექტებს რა პროექტებზეც განაცხადეს შემსრულებლებმა. ინდექსების მიხედვით ყველა შესრულებას დაემატება ანაზღაურება არაუმეტეს 7%-სა, როდესაც ამ მაქსიმუმს მიაღწევს, გაჩერდება“, — აღნიშნავს ზვიად თოიძე.

მთავრობის მიერ აპრილში მიღებული განკარგულებით ფასების ინდექსაციით, სახელმწიფო ტენდერებში მონაწილე ის კომპანიები ისარგებლებენ, რომლებმაც მიმდინარე წლის 1-ელი აპრილიდან შეასრულეს შესაბამისი ინფრასტრუქტურული პროექტები. ამასთან, ინდექსაცია მხოლოდ 1 მაისამდე გამოცხადებულ ტენდერებს შეეხება. დადგენილების მიხედვით, საქსტატმა უნდა შეიმუშაოს შესაბამისი ინდექსი და უზრუნველყოს თანმდევი პროცედურების დანერგვა არაუგვიანეს 2022 წლის 1 ოქტომბრისა.