New York Times-ის ინფორმაციით პანდემიის ფონზე მკვეთრად გაიზარდა იმ ადამიანების შემოსავლები, რომლებიც მსურველებს ძაღლების გასეირნების სერვისს სთავაზობენ. გამოცემა წერს რომ სერვისის ღირებულება ნახევარ საათში 14 დან 35 - მდე აშშ დოლარის ფარგლებში მერყეობს და სერვისის მიმწოდებლების შემოსავლები წელიწადში 100 000 დოლარსაც აჭარბებს.
კორონავირუსის პანდემიის დროს ამერიკაში კატები და ძაღლები ბევრმა აიყვანა და ახლა როდესაც ეს ადამიანები სამუშაო ადგილებზე ბრუნდებიან, იძულებულები არიან რომ შინაური ცხოველების მოსავლელად თუ სასეირნოდ დამხმარეები დაიქირაონ.
სტატისტიკური მონაცემების მიხედვით, პანდემიის დროს აშშ-ში 23 მილიონმა ადამიანმა კატა ან ძაღლი აიყვანა.
The New York Times-ს მოჰყავს პროექტ Parkside Pups-ის დამფუძნებლის მაიკლ ჯოზეფის სიტყვები, რომელმაც მასწავლებლის პროფესია მიატოვა და შინაური ცხოველების წვრთნის კურსები გახსნა.
„მე უბრალოდ ვასწავლიდი ჩემს ლაბრადორს ჩემი ველოსიპედის უკან სირბილს. ადამიანები თავად მოდიოდნენ და ინტერესდებოდნენ. ამდენი ძაღლი პარკებში არასდროს მინახავს,“ – აცხადებს ჯოზეფი, მისი თქმით მასთან ერთი დღით ძაღლის დატოვება 65 დოლარი ჯდება.