8 მარტს დაგეგმილი კონცერტისთვის საავტორო თანამედროვე ბალეტის „ბეატრიჩეს“ ქორეოგრაფის მარიამ ალექსიძის მომსახურება ქუთაისის მერიას 12755 ლარი უჯდება. აღნიშნულ მომსახურებას კი მერია გამარტივებული შესყიდვით შეიძენს.
როგორც სახელმწიფო შესყიდვების ვებგვერდზე გამოქვეყნებულ ინფორმაციაში ვკითხულობთ, 8 მარტს, ქალთა საერთაშორისო დღესთან დაკავშირებით ქუთაისში, ლადო მესხიშვილის სახელობის პროფესიულ სახელმწიფო დრამატულ თეატრში დაგეგმილია გიორგი ალექსიძის სახელობის თბილისის თანამედროვე ბალეტის სპექტაკლის „ბეატრიჩე“ წარმოდგენა.
„სპეციალურად ბალეტისათვის „საქართველოს სინფონიეტას“ მიერ შესრულდება, ოსკარისა და ოქროს გლობუსის მფლობელი კომპოზიტორის, დარიო მარიანელის საავტორო მუსიკა. პროფესორ დავით მაზიაშვილის იდეით, კონცეფციითა და ხელმძღვანელობით დანტე ალიგიერის „ღვთაებრივი კომედიის“ მიხედვით, ქორეოგრაფმა მარიამ ალექსიძემ შექმნა საავტორო თანამედროვე ბალეტი - „ბეატრიჩე“.
მარიამ ალექსიძის ორიგინალური თანამედროვე ბალეტის „ბეატრიჩე“ მსოფლიო პრემიერა შედგა 2021 წელს, თბილისის შოთა რუსთაველის სახელმწიფო თეატრის დიდ სცენაზე.
გიორგი ალექსიძის სახელობის „თბილისის თანამედროვე ბალეტი“ პირველი თანამედროვე საბალეტო დასია საქართველოში. დასი განსხვავებული ხასიათით, ესთეტიკით, თანამედროვე ფორმების ძიებით, მხატვრული ხედვითა და საავტორო რეპერტუარით გამოირჩევა. დასის ძირითად იდეას წარმოადგენს ქორეოგრაფიაში თავისუფალი აზროვნების დამკვიდრება, ხელოვნებაში ახალი ფორმების ძიება და ტრადიციების შენარჩუნებით მუდმივი განვითარების პროცესისაკენ სწრაფვა.
გიორგი ალექსიძის სახელობის „თბილისის თანამედროვე ბალეტს“ მნიშვნელოვანი წვლილი შეაქვს საქართველოში თანამედროვე ბალეტის და ცეკვის განვითარებისა და პოპულარიზაციის საქმეში. დასი მუდმივად მოგზაურობს საგასტროლოდ საქართველოსა და უცხოეთში; ინიციატორია არაერთი საერთაშორისო თანამშრომლობის. თანაპროექტები და კოლაბორაციები დასის ერთ-ერთი ძლიერი მხარეა და გამოირჩევა ალტერნატიულ სივრცეებში საინტერესო ჩანაფიქრების განხორციელებით," - აღნიშნულია სახელმწიფო შესყიდვების ვებგვერდზე განთავსებულ ინფორმაციაში.