იანვარ - აგვისტოში საერთაშორისო საავტომობილო სატვირთო გადაზიდვებზე გაცემული ნებართვების რაოდენობა 6%-ით გაიზარდა. როგორც „კომერსანტს“ სსიპ სახმელეთო ტრანსპორტის სააგენტოში (lta) განუცხადეს, 2022 წელს, წინა წლებთან შედარებით საავტომობილო სატვირთო გადაზიდვების მზარდი დინამიკიდან გამომდინარე და სააგენტოს სტრუქტურული ქვედანაყოფის ეფექტური მუშაობის შედეგად, გაცემული საერთაშორისო სატვირთო გადაზიდვის ერთჯერადი და მრავალჯერადი ნებართვების გაცემის რაოდენობა მკვეთრად გაიზარდა.

უწყების ინფორმაციით:

2021 იანვარ-აგვისტო - გაცემულია 107,420 ერთეული სანებართვო დოკუმენტი.

2022 იანვარ-აგვისტო - გაცემულია 114,200 ერთეული სანებართვო დოკუმენტი.

აღსანიშნავია, რომ სსიპ სახმელეთო ტრანსპორტის სააგენტო 35 ქვეყანასთან ცვლის საერთაშორისო საავტომობილო სატვირთო გადაზიდვის ერთჯერად და მრავალჯერად ნებართვებს, ასევე საერთაშორისო ორგანიზაციებიდან ECMT; ITF; TRACECA; BSEC იღებს საქართველოსთვის გამოყოფილ ნებართვებს შესაბამისი კვოტების ფარგლებში.

ნებართვების მოქმედების ვადა, როგორც წესი არის 1 წელი.

„ნებართვა გაიცემა კომპანიაზე, რომელსაც მიღებული აქვს საერთაშორისო სატვირთო გადაზიდვის ნებართვა კონკურსის წესით. მოქმედების ვადა 1 წელი, ამ ნებართვის მიღების შემდეგ შეუძლია მიიღოს ნებართვები საერთაშორისო გადაზიდვების განსახორციელებლად. ასევე უნდა აღინიშნოს, რომ ECMT ნებართვის მისაღებად განმცხადებელმა უნდა დააკმაყოფილოს დამატებითი პირობები“, - განმარტავენ სახმელეთო ტრანსპორტის სააგენტოში.

რაც შეეხება სატარიფო პოლიტიკას, ის დაფუძნებულია სააგენტოს მიერ გაწეული მომსახურების პირდაპირ და ირიბ დანახარჯებზე, (მათ შორის საქართველოს კანონმდებლობით გათვალისწინებული გადასახადების და დარგის განვითარებისთვის, ინფრასტრუქტურული პროექტების განხორციელების, პარტნიორ ქვეყნებთან კომუნიკაციის ხარჯების დაფარვაზე) რომელიც დამოკიდებულია კონკრეტული ქვეყნის ნებართვის სახეობის მიღებასთან და მის ოპერირებასთან დაკავშირებულ გასავალზე, შესაბამისად დიფერენცირებულია.