რა ეკონომიკური ეფექტი ექნება პრემიერ-მინისტრის მიერ დაანონსებულ მსოფლიო დონის ვარსკვლავების ჩამოყვანას და მიიღებს თუ არა რეალურ სარგებელს ქვეყანა.
როგორც „კომერსანტთან“ საუბრისას „ჰელისკი ჯორჯიას“ დამფუძნებელმა ვატო ასათაშვილმა განაცხადა, ამ მიმართულებით ადგილი აქვს უპასუხისმგებლო მიდგომას და ფულის ხარჯვა ხდება ისე, რომ არაა დაანგარიშებული მოსალოდნელი ეკონომიკური სარგებელი.
ვატო ასათაშვილის აზრით, უნდა მოხდეს დათვლა, თუ რა უკუგება აქვს ამა თუ იმ დანახარჯს და კონკრეტულ ღონისძიებას, რა კონკრეტული შედეგები მოაქვს რეგიონულ დონეზე, ან საქართველოს ცნობადობის ზრდისთვის.
„პრობლემა ტრადიციულად ისევ და ისევ არის ის, რომ არ ვიცით, 70 მლნ ლარს რომ დავხარჯავთ, რეალური მოგება რამდენი იქნება. ამას არავინ არ ითვლის. არც არავინ არასოდეს არ ითვლიდა და არც არავინ არ დაითვლის. ანალოგიურად თანხები იხარჯებოდა ტურიზმიდან, სარეზერვო ფონდებიდან, მაგრამ იყო ერთგვარი ხედვა, რომ თანხის დახარჯვა კონცერტებში კარგია, თუმცა რაციონალური კონკრეტული გაანგარიშება, თითო კონცერტს რამხელა უკუგება აქვს და რა ეკონომიკური სარგებელი აქვს, არ ყოფილა. სავარაუდოდ არც ახლა არ იქნება, რაც ძალიან ცუდია. საქმე გვაქვს უპასუხისმგებლო მიდგომასთან, რომ როგორმე ფული დავხარჯოთ.
მეორე, პრობლემა არის ისევ და ისევ „ბლექ სი არენა“, საერთოდ ვინ დახარჯავს ამ თანხებს და როგორ განკარგავენ. ეს ადრეც ასე იყო და აქ ახალი არაფერია. სულ ამ ჩაკეტილ წრეში ვტრიალებთ. თანხებს განკარგავდნენ, როგორ წესი მთავრობასთან დაახლოებული, ან აფილირებული ჯგუფები, გაუმჭვირვალედ, ერთ პირთან მოლაპარაკების გზით, ყოველგვარი ტენდერის გარეშე“-, მიიჩნევს ვატო ასათაშვილი.
„ჰელისკი ჯორჯიას“ დამფუძნებელი ფიქრობს, რომ პროცესების მსგავსი განვითარება ავტომატურად გამორიცხავს კონკურენციას.
„რეალურად რამდენი იხარჯებოდა კონკრეტული ღონისძიების ორგანიზებაზე და რამდენი იხარჯებოდა ამ აფილირებული ჯგუფების კმაყოფაზე, ეს ცალკე პრობლემაა. ახლაც ანალოგიური სიტუაცია იქნება. რაც შეეხება ამ „ბლექ სი არენას“, რაც უკვე ყბადაღებული თემაა, ვხედავთ რომ ეს არის საბიუჯეტო ორგანიზაცია, რომელიც მოქმედებს, არ მოქმედებს თუ გაჩერებულია, მაინც ჩვენი სარჩენია. არაფერში ფულს ვიხდით. იმის ნაცვლად, რომ იყოს კომერციული ორგანიზაცია, რომელიც საკუთარი თავის რჩენის გარდა, მოგებას უნდა წერდეს, აბსოლუტურად საპირისპირო ხდება. აქაც ასოცირებული პირები იღებენ ხელფასებს და ხარჯის გარდა, არაფერი დიდი სარგებელი არ მოაქვს. საბოლოო ჯამში, ასე იქნება, თუ ისე იქნება, საქმე არამიზნობრივ ხარჯვასთან გვაქვს და დავარქვათ ამას ერთგვარი პოლიტიკური კამპანია, რომელიც არც თუ ისე გამჭვირვალეა და ალბათ რაღაც დონეზე, მინიმალური ეკონომიკური შედეგი ექნება“, - ამბობს „ჰელისკი ჯორჯიას“ დამფუძნებელი.
ვატო ასათაშვილი მიიჩნევს, რომ მთავრობის მოტივი დღეს არის ის, რომ მოხდეს საბიუჯეტო თანხების ათვისება.
„ამის მიღმა ქვე-მოტივები რაც არის, არის ის, რომ რაც შეიძლება მეტი თანხა აითვისოს ისე, რომ არ იყოს გამჭვირვალე და ეს თანხები გადანაწილდეს ისე, რომ მთავრობიდანაც ფინანსური სარგებელი მიიღონ, ამის ეჭვი არსებობს. მეორე პრობლემაა ის, რომ თანხების გადანაწილება ერთ პირთან მოლაპარაკებით არასწორია. საქართველოში არიან საკმაო რაოდენობის პრომოუტერები და კომპანიები, რომლებიც ამ მიმართულებით მუშაობენ და რომელთაც აქვთ ძალიან კარგი კავშირები.
საქართველოში ჩამოყალიბდა კონცერტების და სხვადასხვა ღონისძიებების მართვის კულტურა და ეს უნდა ხდებოდეს საჯარო კონკურენციის პირობებში. უნდა მოხდეს ანალოგიური პროექტების გატენდერება და კონკურენციის პირობებში, დაბალი ფასის და მაღალი ხარისხის შეთავაზებით, სხვადასხვა გუნდებს უნდა შეეძლოთ ამის ორგანიზება. როდესაც გვაქვს ერთი დომინანტი „ბლექ სი არენა“ და ის განკარგავს ყველაფერს, რა თქმა უნდა, ეს არის მახინჯი პრაქტიკა“, - აცხადებს ვატო ასათაშვილი.