თურქეთის ენერგეტიკისა და ბუნებრივი რესურსების მინისტრმა ფათიჰ დონმეზმა განაცხადა, რომ თურქეთის მე-4 საბურღმა გემმა „აბდულჰამიდ ჰანმა“ აღმოსავლეთ ხმელთაშუა ზღვაში Yörükler-1 ჭაბურღილზე ბურღვა დაიწყო. აღნიშნული ჭაბურღილი, ანტალიის გაზიფაშას რაიონიდან 55 კილომეტრში მდებარეობს.

როგორც trt.net.tr იტყობინება, აღნიშნულის შესახებ ინფორმაცია  მინისტრმა სოციალური ქსელის მეშვეობით გაავრცელა.

„ამჯერად ჩვენ გადაწყვეტილი გვაქვს გავიმეოროთ შავი ზღვის წარმატება ახალი სასიხარულო ამბებით ხმელთაშუა ზღვიდან. დარწმუნებული ვარ, ჩვენი ინჟინრების თავდადებისა და ჩვენი ხალხის ლოცვის წყალობით, ბურღვა ამჯერადაც ნაყოფიერი იქნება“, - წერს მინისტრი სოციალურ ქსელში.

ცნობისათვის, თურქეთის მე-4 საბურღი გემი, აბდულჰამიდ ჰანი საბურღი სამუშაოების ჩასატარებელ ადგილზე, მერსინიდან 9 აგვისტოს, პრეზიდენტ რეჯეფ თაიფ ერდოღანის მონაწილებით გამართული ცერემონიით გაიგზავნა. მეშვიდე თაობის საბურღი ხომალდი 238 მ სიგრძისა და 42 მ სიგანისაა. „აბდულჰამიდ ჰანის“ 200 კაციან გუნდს შეუძლია ბურღვა 12200 მ სიღრმეზე.

მსოფლიოში ამ კლასის მხოლოდ 4-5 საბურღი ხომალდია და მათგან ერთ-ერთი თურქეთის განკარგულებაშია.

თურქეთის საჭიროებისთვის საძიებო და ბურღვას დღემდე სამი ხომალდი ახორციელებდა: Fatih, Kanuni და Yavuz, წერს Anadolu.

გემი დანიშნულების ადგილას 10 აგვისტოს ჩავიდა.