დიდი ბრიტანეთის მთავრობა რუსი ოლიგარქის რომან აბრამოვიჩის საფეხბურთო კლუბის „ჩელსის“ გაყიდვიდან მიღებულ 2,8 მილიარდ დოლარს უკრაინის ფონდს გადასცემს - ამის შესახებ ინფორმაციას The Telegraph ავრცელებს. გამოცემის ცნობით ეს იქნება ისტორიაში ომის მსხვერპლთათვის ერთ-ერთი ყველაზე დიდი საქველმოქმედო შემოწირულება, რომელიც ფონდში რამდენიმე კვირაში გადაირიცხება, თუმცა ეს საკითხი ჯერ ევროკავშირმა უნდა დაამტკიცოს, რადგან აბრამოვიჩი როგორც გაერთიანებული სამეფოს, ასევე, ევროკავშირის სანქციებს ექვემდებარება.
ფონდი ახლადშექმნილია და გაერთიანებული სამეფოს საქველმოქმედო კომისიის ლიცენზიას ელოდება, ფონდს საქველმოქმედო ორგანიზაციის UNICEF -ის ბრიტანული განყოფილების ყოფილი ხელმძღვანელი მაიკ პენროუზი უხელმძღვანელებს. პირობა დიდი ბრიტანეთის მთავრობისა და აბრამოვიჩს შორის 2022 წლის მაისის ხელმოწერილ შეთანხმებაშია გათვალისწინებული.
გასული წლის მაისში მაიკ პენროუზი The Telegraph-თან ინტერვიუში აღნიშნავდა, რომ ფონდის ამოცანებს შორის უკრაინელი ხალხისთვის ჰუმანიტარული დახმარება, მათ შორის სამედიცინო აღჭურვილობის მიწოდებაა, მისი თქმით ფონდი დაეხმარება ფრონტის ხაზზე მყოფ ადამიანებს, საკვებით, განათლებით და სამედიცინო სერვისებით
აბრამოვიჩის პრესსამსახური განმარტავს, რომ კლუბის გაყიდვის შემდეგ ფული „აბრამოვიჩის ანგარიშზე არ გადარიცხულა და მას შემდეგ ბრიტანეთის ხელისუფლების განკარგულებაშია. მილიარდერს ამ ფულზე წვდომა არა აქვს და მის განკარგვაში არ მონაწილეობს.“
2003 წელს აბრამოვიჩმა ჩელსი 187 მილიონ დოლარად იყიდა, ხოლო 2022 წლის მაისში გაყიდა. კლუბის მფლობელი ინვესტორთა ჯგუფი გახდა, რომელსაც ამერიკელი მილიარდერი ტაოდ ბოელი ხელმძღვანელობს.