ვარაუდობენ, რომ რუსმა ბიზნესმენმა რომან აბრამოვიჩმა უკრაინაში ომის დაწყებამდე ოფშორში გადაიტანა თავისი აქტივების უდიდესი ნაწილი, რაც მისი შვილების სახელზეა გაფორმებული. ამის შესახებ ლაპარაკია ბრიტანულ გაზეთ The Guardian-ის მიერ ჩატარებულ ჟურნალისტურ გამოძიებში.
ჟურნალისტების მტკიცებით, 2022 წლის თებერვლის დამდეგს აბრამოვიჩმა სასწრაფოდ ჩაატარა 10 ოფშორული კომპანიის რეორგანიზაცია და საკუთარი შვილების სახელზე გადაიყვანა ისინი. კომპანიების საერთო ნომინალური ღირებულებაა ოთხი მილიარდი დოლარი, თუმცა მათი რეალური ღირებულება შეიძლება მეტიც იყოს.
ჟურნალისტები ეყრდნობიან გაჟონილ მონაცემებს კვიპროსული კომპანიიდან, რომელიც აბრამოვიჩის ოფშორულ აქტივებს ემსახურება. ამ მონაცემების თანახმად, მან 4 თებერვალს დაიწყო ოფშორების რეორგანიზაცია. იანვრის ბოლოს ევროკავშირის ქვეყნებმა და აშშ-მა გამოაცხადეს, რომ უკრაინაში რუსეთის შეჭრის შემთხვევაში რუს ოლიგარქებს სანქციებს დაუწესებენ. 24 თებერვლისთვის, უკრაინაში რუსეთის შეჭრისას, აბრამოვიჩი უკვე გამორიცხული იყო ორი ოფშორული კომპანიის ბენეფიციართა რიცხვიდან, დანარჩენი რვა კომპანიის ბენეფიციარები კი მისი შვილები გახდნენ.
კვიპროსსა და ჯერსიში აბრამოვიჩის ოფშორული ტრასტების აქტივებში შედის მსხვილი კომპანიების აქციები, ასევე უძრავი ქონება და იახტები. ოლიგარქის შვილებს ახლა ეკუთვნით აქტივების 50%-დან 100%-მდე. დიდი ბრიტანეთისა და ევროკავშირის კანონებით ნებადართულია სანქციების სიაში მოხვედრილი პირების აქტივების გაყინვა მხოლოდ იმ შემთხვევაში, თუკი ეს პირები კომპანიის 50%-ზე მეტს ფლობენ.
რომან აბრამოვიჩი რუსეთში ერთ-ერთი უმდიდრესი ადამიანია. Forbes-ი მის დღევანდელ ქონებას 6,9 მილიარდ დოლარად აფასებს. რუსეთის მიერ უკრაინაში ომის დაწყების შემდეგ აბრამოვიჩს სანქციები დაუწესეს ევროკავშირმა, დიდმა ბრიტანეთმა, შვეიცარიამ, კანადამ, ავსტრალიამ და ახალმა ზელანდიამ.
აბრამოვიჩს შვიდი შვილი ჰყავს. ხუთი მათგანი სრულწლოვანია. ყველაზე უმცროსი ცხრა წლისაა.
აბრამოვჩი
