აჭარა ტურისტული მარკეტინგული კამპანიისთვის 2023 წელს 6 769 000 ლარს დახარჯავს. ბათუმი მიმდინარე წელს „ტურიზმის ოსკარად“ წოდებულ World Travel Awards Gala Ceremony-ს გალა ცერემონიალს უმასპინძლებს, რისთვისაც 1 500 000 ლარია გამოყოფილი. ამ პერიოდში ბათუმი უმასპინძლებს მსოფლიოს ტურიზმის სფეროს წარმომადგენლებს, რაც გაშუქდება საერთაშორისო მედია პლატფორმის მეშვეობით მილიონობით მაყურებლისთვის. World Travel Awards Gala Ceremony წარმოადგენს უნიკალურ პლატფორმას, რომ 2023 წელს, რომელიც ტურიზმის ოფიციალური აღდგენის წლად არის დასახელებული, ბათუმმა შეძლოს საერთაშორისო მასშტაბით, ეფექტურად პოზიციონირება როგორც სტაბილურმა და უსაფრთხო ტურისტულმა მიმართულებამ, და კიდევ უფრო გაიმყაროს პოზიციები მსოფლიო ტურისტულ რუკაზე.

ასევე, ეს ღონისძიება ხელს შეუწყობს 190-ზე მეტი ქვეყნის ტურისტული სექტორის წარმომადგენლებს უკეთ გაიცნონ რეგიონის ტურისტული შესაძლებლობები.

2023 წელს აჭარის ტურიზმისა და კურორტების დეპარტამენტის საერთაშორისო ან/და სამიზნე ქვეყნებში სხვადასხვა სარეკლამო აქტივობების წარმოებისთვის ბიუჯეტიდან 3 819 000 ლარის დახარჯვა შეუძლია. რაც შეეხება ქვეყნის შიგნით რეგიონის ტურისტული პოტენციალის რეკლამირებას აჭარის ტურიზმის დეპარტამენტი 400 000 ლარს დახარჯავს, ხოლო ტურისტული პროდუქტების პოპულარიზაციისა და მოგზაურობის წახალისებასთან დაკავშირებული მომსახურებისთვის 400 000 ლარს.

სარეკლამო ვიდეო რგოლის დამზადების მომსახურებისთვის ბიუჯეტით 200 000 ლარია გათვალისწინებული, ხოლო საპრომოციო, სარეკლამო მასალის, სუვენირების, ღვინის და სხვა თემატური მასალის დამზადება/შეძენასთან დაკავშირებით 100 000 ლარი.

2023 წელს სხვადასხვა ღონისძიებები, მასტერკლასები და ექსპედიციები 200 000 ლარით დაფინანსდება. ტურისტული ტიპის ბროშურებისთვის (მათ შორის, სახელმძღვანელოების, გაიდების, გზამკვლევების) კი 150 000 ლარი.