აჭარაში წელს, წინასწარი მონაცემებით, 60 ათას ტონამდე ციტრუსის მოსავალს ელოდებიან. როგორც აჭარის სოფლის მეურნეობის მინისტრის მოადგილე ირმა აფხაზავა აცხადებს, წელს ციტრუსის საკმაოდ კარგი მოსავალი იქნება, თუმცა დაზუსტებული პროგნოზი მაინც აგვისტოს ბოლოსკენ დაიდება. მინისტრის მოადგილის თქმით, ციტრუსის ჩამბარებელი ცენტრები და თავად საწარმოები უკვე ფაქტობრივად მზად არიან.
„ციტრუსის საპროგნოზო მაჩვენებელი, მცენარის ბიოლოგიური თავისებურებებიდან გამომდინარე, დაახლოებით აგვისტოში დგება. მაგრამ თუ გადავხედავთ ბოლო წლების მონაცემებს, შეიძლება ასეთი პროგნოზი დავდოთ: ციტრუსის 22/23 წლის სეზონისთვის ჩვენ ველოდებით 45-60 ათას ტონა ციტრუსის წარმოებას. რაც შეეხება ექსპორტს, გასული პრაქტიკის გათვალისწინებით, 35-დან 40 ათას ტონამდე რეალიზდება სხვადასხვა ქვეყნებში. ძირითადი აქცენტი საექსპორტო ქვეყნებიდან მაინც კეთდება სომხეთი, აზერბაიჯანი, მოლდოვა, ბელარუსი, ასევე ევროკავშირის ქვეყნები, ბალტიისპირეთის ქვეყნები: ლიეტუვა ლატვია. ეს ის ძირითადი საექსპორტო ბაზრებია სადაც ჩვენი ციტრუსი გადის. მოგეხსენებათ უკრაინა გასული წლების სტატისტიკაში არის, მაგრამ უკრაინაში მიმდინარე საომარი მოქმედებების ფონზე, ამ ბაზარზე ექსპორტი ვერ მოხერხდება. გარკვეული აქცენტი კეთდება რუსეთის ბაზარზეც“, - აცხადებს აჭარის სოფლის მეურნეობის მინისტრის მოადგილე.
აფხაზავა ამბობ, რომ სამინისტრომ თადარიგი დაიჭირა და უკვე აწარმოა შეხვედრები წარმოების ჯაჭვში ჩართულ სუბიექტებთან.
„განვახორციელეთ მონიტორინგი და უკვე გვაქვს მონაცემები მათი მზადყოფნის შესახებ. სამინისტროში გვქონდა ასევე შეხვედრა მწარმოებლებთან, ექსპორტიორებთან, რათა წინასწარ გვქონოდა მონაცემები რა ვითარებაა ბაზარზე. სტაბილურად მათაც კარგი პროგნოზები აქვთ, ლოჯისტიკური მიმართულება მთლიანად არის დალაგებული და პარალელურად იგეგმება არასამრეწველო მანდარინის გადამუშავება. წლებია ვიცით, რომ ეს მიმართულება სუბსიდირება და არასტანდარტულ მანდარინის შემთხვევაში 1 კგ-ზე არის სუბსიდია 20 თეთრი. ციტრუსის მისაღებად უკვე მზად არიან საწარმოებიც“, - აცხადებს აფხაზავა.
აღსანიშნავია, რომ გასულ სეზონზე აჭარიდან 38,268 ტონა ციტრუსის ექსპორტი განხორციელდა. საანგარიშო პერიოდში მანდარინის ექსპორტი განხორციელდა ყაზახეთში, ესტონეთში, ყირგიზეთში, სლოვენიაში, ბელორუსიაში, მოლდოვაში, უკრაინაში, სომხეთში, რუსეთში და სხვა.
აჭარის სოფლის მეურნეობის სამინისტროს მონაცემებით, ციტრუსის მთავარ საექსპორტო ბაზრებზე გასულ წელს გატანილი პროდუქციის მოცულობა ასეთია:
სომხეთი - 26133ტ
უკრაინა - 3851ტ
მოლდოვა - 600ტ
სლოვენია - 300ტ
შუა აზია - 400ტ
ბალტიისპირეთი - 200ტ