აჭარის რეგიონის დაცულ ტერიტორიებსა და ჯავახეთის ეროვნულ პარკში პროექტი „სათემო რეინჯერი“ მიმდინარეობს, რომლის მიზანი ადგილობრივი ახალგაზრდობის ჩართულობით, თანამონაწილეობრივი მართვის პრინციპების დანერგვა და გარემოსდაცვითი ცნობიერების ამაღლებაა. ინფორმაციას გარემოს დაცვისა და სოფლის მეურნეობის სამინისტროს დაცული ტერიტორიების სააგენტო ავრცელებს.

„პროექტის ფარგლებში, კინტრიშის, მაჭახელასა და მტირალას ეროვნული პარკების „სათემო რეინჯერებს” გაცნობითი ხასიათის შეხვედრა ჩაუტარდათ ჯავახეთის დაცულ ტერიტორიებზე. ღონისძიების მონაწილეებმა, ჯავახეთის ეროვნული პარკის ადმინისტრაციის რეინჯერებთან ერთად, მონაწილეობა მიიღეს ხანჩალის ტბის მიმდებარე ტერიტორიის დასუფთავებაში, მოინახულეს ბუღდაშენისა და კარწახის ტბები და სოფელი გორელოვკა. კარწახის ტბაზე საინფორმაციო ტური მოეწყო გავრცელებული ფრინველებისა და მათი მონიტორინგის მეთოდების შესახებ.

შეხვედრის ფარგლებში, „სათემო რეინჯერები” სამცხე-ჯავახეთის უნივერსიტეტის ახალქალაქის ფილიალის სტუდენტებს შეხვდნენ და პროექტისა და განხორციებული აქტივობების შესახებ ინფორმაცია და გამოცდილება გაუზიარეს.

„სათემო რეინჯერებთან” ერთად, ჯავახეთის დაცულ ტერიტორიებზე იმყოფებოდნენ კავკასიის ბუნების ფონდის (CNF)დირექტორი ტობიას მიუნხმაიერი და პროექტის მენეჯერი თამარ პატარიძე, რომლებმაც დასუფთავების აქციაშიც მიიღეს მინაწილეობა.

აღსანიშნავია, რომ პროექტის „სათემო რეინჯერი“ ფარგლებში, 18 მონაწილე - სათემო რეინჯერი შეირჩა. მონაწილეებს ტრენინგები ჩაუტარდათ დაცული ტერიტორიების, ბიომრავალფეროვნების მონიტორინგისა და მონიტორინგში თანამედროვე ტექნოლოგიების გამოყენების თემატიკაზე. პრაქტიკული ნაწილი, ეროვნული პარკის რეინჯერებთან აქტიური თანამშრომლობით, უშუალოდ მონიტორინგის ღონისძიებებში ჩართულობას მოიცავს.

პროექტი „სათემო რეინჯერი“ ხორციელდება გარემოსდაცვითი ორგანიზაციის „მწვანე ბორჯომი” მიერ, სახეობათა კონსერვაციის სამეცნიერო კვლევით ცენტრთან „ნაკრესი” და დაცული ტერიტორიების სააგენტოსთან ერთად, კავკასიის ბუნების ფონდის (CNF – Caucasus Nature Fund) ფინანსური მხარდაჭერით, UNDP/GEF პროექტის ,,საქართველოს დაცული ტერიტორიების სისტემის ფინანსური მდგრადობის ხელშეწყობა” ფარგლებში.

პროექტი „სათემო რეინჯერი“ სხვადასხვა დაცულ ტერიტორიაზე მიმდინარეობს. ამ ეტაპზე, პროექტი ერუშეთის ეროვნული პარკის მოსახლეობისთვისაც ხორციელდება“ – ნათქვამია ინფორმაციაში.