აჭარის ჯანმრთელობისა და სოციალური დაცვის მინისტრის პირველი მოადგილე, მარი ზანაქიძე ფონდი „გლობალური ინიციატივა ფსიქიატრიაში“ და ა/ო „დემოკრატიის ინსტიტუტის“ ორგანიზებულ შეხვედრა-დისკუსიას დაესწრო თემაზე: ზრუნვა ახალგაზრდობის ფსიქიკური კეთილდღეობისთვის და არსებული სერვისები აჭარის რეგიონში.
შეხვედრაზე წარმოდგენილი იქნა ევროკავშირის მიერ დაფინანსებული პროექტი - “სამოქალაქო საზოგადოება აღდგენისუნარიანობისა და უსაფრთხოებისთვის (CiSSCo)”, რომელიც მიზნად ისახავს საზოგადოების უსაფრთხოებისა და აღდგენისუნარიანობის ხელშეწყობას ეროვნული ანტინარკოტიკული სტრატეგიისა და საქართველოში არასრულწლოვანთა მართლმსაჯულების რეფორმის წარმატებით განხორციელებისათვის.
სპეციალისტებმა ასევე ისაუბრეს ფსიქოაქტიური საშუალებების გამოყენების პრევენციის ინსტიტუციური მექანიზმებისა და ადგილობრივი შესაძლებლობების გაძლიერებისა და ფსიქიკურ ჯანმრთელობაზე ზრუნვის თანამედროვე მიდგომების შესახებ.
“აჭარის ჯანდაცვის სამინისტრო სახელმწიფო პროგრამების პარალელურად ცდილობს კიდევ უფრო ხელმისაწვდომი გახადოს ის სერვისები, რომლებიც რეგიონის მოსახლეობისათვის მნიშვნელოვანია. სამინისტრო აფინანსებს ბავშვთა ფსიქოსომატურ აბილიტაცია/რეაბილიტაციას, უზრუნველყოფს ფსიქიკური პრობლემების მქონე პირებს საცხოვრისით. მიმდინარე წელს ამოქმედდა ახალი პროგრამა, ალკოჰოლის მიღებით გამოწვეული ფსიქიკური და ქცევითი აშლილობის მქონე ბენეფიციარების სტაციონარული მომსახურება. სამინისტრო მზად არის მხარი დაუჭიროს ყველა ახალ ინიციატივას, რომელიც მორგებული იქნება ჩვენი მოსახლეობის საჭიროებებზე,” - აღნიშნა მინისტრის პირველმა მოადგილემ, მარი ზანაქიძემ.
დაინტერესებულ მხარეებთან ერთად შეხვედრას ესწრებოდა აჭარის უმაღლესი საბჭოს ჯანმრთელობის დაცვისა და სოციალურ საკითხთა კომიტეტის თავმჯდომარე, ილია ვერძაძე.
“სამოქალაქო საზოგადოება აღდგენისუნარიანობისა და უსაფრთხოებისთვის (CiSSCo)” პროექტის ფარგლებში „დემოკრატიის ინსტიტუტი“ პირველ ეტაპზე აჭარასა და იმერეთში, სამიზნე ჯგუფებში ჩაატარებს კვლევას, გამოავლენს მთავარ პრობლემებსა და გამოწვევებს, რომელზეც შემდგომში განახორციელებს ადვოკატირებას.
აჭარის მთავრობა 
