ქართული წვენის -  „ალალის“  მწარმოებელი კომპანია შპს ,,აჩინებული“ მზადაა, წელს 700 ტონამდე ხილი და ყურძენი ჩაიბაროს. კომპანიის მიერ წარმოებული პროდუქცია მსოფლიოს წამყვანი ქვეყნების ბაზრებზე იყიდება მას შემდეგ, რაც მენეჯმენტმა რუსულ ბაზარზე, მისი არასტაბილურობის გამო, უარი თქვა. როგორც „აჩინებულის“ დამფუძნებელი  გოჩა ღვინეფაძე „კომერსანტთან“ ამბობს, მის პროდუქციაზე მოთხოვნა დიდია, თუმცა, მნიშვნელოვანია სტაბილური და უწყვეტი მომარაგება.

მეწარმის თქმით, მაღალი ხარისხის დიდი რაოდენობის ნედლეული ქართული ექსპორტისთვის ერთ-ერთი მთავარი გამოწვევაა.

როგორც გოჩა ღვინეფაძემ აღნიშნა, ამ ეტაპზე აქტიურად მიმდინარეობს ხილის შესყიდვის პროცესი. უკვე ჩაბარებული აქვთ ალუბალი, მაყვალი და მუშაობენ ატმის მოსავალზე, რის შემდეგაც დაგეგმილია ყურძნის, ბროწეულის და შემდეგ უკვე ვაშლის შესყიდვა.

,,პროდუქცია 6 ქვეყანაში გაგვაქვს. საერთო ჯამში, წელს შეიძლება 600-700 ტონა ხილი ჩავიბაროთ.  საექსპორტო ქვეყნებია  ამერიკა, კანადა, ერაყი, ქუვეითი, ყაზახეთი და  უკრაინა.  მალე დავიწყებთ ექსპორტს ბალტიისპირეთის ქვეყნებსა და დუბაის ბაზრებზე. რუსეთი ჯერჯერობით არასტაბილურია, ამიტომ ამ მიმართულებით გადაზიდვებისგან თავს ვიკავებთ. მოგეხსენებათ, რომ იმპორტთან დაკავშირებით რუსეთი გარკვეულ შეზღუდვებს აწესებს, რაც დიდ დაბრკოლებას და დისკომფორტს გვიქმნის. ამიტომ გადავწყვიტეთ, რომ ალტერნატიულ ბაზრებზე გავაქტიურდეთ“, - ამბობს გოჩა ღვინეფაძე.

მისი თქმით, პანდემიას გარკვეული ნეგატიური პროცესები ახლავს, თუმცა ექსპორტზე დაბრკოლება არ არის და ქართული წვენები მსოფლიოს წამყვანი ქვეყნების ბაზრებზე ერთ-ერთი მოთხოვნადი პროდუქტია.

„პანდემიიდან გამომდინარე, პრობლემა ყველგანაა. მოთხოვნა დიდია, ამიტომ ახალი პროექტები მოითხოვს მეტ კომუნიკაცაის, მისვლა-მოსვლას, მოლაპარაკებას, რასაც პანდემია ხელს უშლის.  საბოლო ჯამში, ბაზრებს ისე ვიმატებთ, რის მომარაგებაც შეგვიძლია,  სტიქიურად არაფერი ხდება. ვმუშაობთ,  რისი შესაძლებლობაც გვაქვს“, - დასძენს ღვინეფაძე.

შეგახსენებთ, რომ „ალალის“ წვენები საქართველოში სუპერმარკეტების თითქმის ყველა მსხვილ ქსელშია წარმოდგენილი. მათ შორის „გუდვილში“, „კარფურში“, „აგროჰაბში“, „ზღაპარში“, „ფრესკოში“ და სხვა.

„აჩინებული“ ამ ეტაპზე რამდენიმე სახეობის წვენს აწარმოებს. მათ შორის -  ვაშლის, ატმის, ყურძნის, მაყვალისა და ციტრუსის. მალე გამოჩნდება ალუბლის „ალალიც“, ხოლო სამომავლოდ - ბროწეულის.

 „აჩინებულის“ საწარმო თელავში მდებარეობს. ის „ერთიანი აგროპროექტის“ ფარგლებში შეიქმნა და გასული წლის ზაფხულიდან ამოქმედდა. საწარმოში ჯამში 2,8 მილიონი ლარის ინვესტიცია განხორციელდა.

მარი ჩიტაია