აზიის განვითარების ბანკმა (ADB) 4 მილიონი აშშ დოლარის ($) ინვესტიცია განახორციელა „საქართველოს განახლებადი ენერგიის ოპერაციების“ (GRPO) მიერ გამოშვებულ მწვანე ობლიგაციებში, რაც კომპანიის მუშაობას დაეხმარება. ინვესტიცია ასევე დამატებით კაპიტალს შესძენს GRPO-ს დამფუძნებელ კომპანიას სს „საქართველოს განახლებადი ენერგიის კომპანიას“, მისი განახლებადი ენერგობიზნესის ხელშესაწყობად.

ADB-ის ინვესტიცია წარმოადგენს GRPO-ს მიერ გამოშვებული ხუთწლიანი $80 მილიონიანი მწვანე ობლიგაციის ნაწილს — საქართველოში პირველად ადგილობრივად განთავსებულ მწვანე ობლიგაციას და საქართველოს საფონდო ბირჟაზე განთავსებულ უმსხვილეს ობლიგაციას. ADB ასევე ადმინისტრირებას გაუწევს აზიის კერძო სექტორის ინფრასტრუქტურის წამყვანი ფონდის (LEAP) მიერ გამოყოფილ $4 მილიონიან რესურსს.

“პირველი ადგილობრივად გამოშვებული მწვანე ობლიგაციებისა და საქართველოში განთავსებული ყველაზე მსხვილი ობლიგაციის საშუალებით ADB ხელს შეუწყობს საქართველოს ადგილობრივი კაპიტალის ბაზრის განვითარებას. ეს ინვესტიცია კიდევ ერთია ჩვენი, როგორც საქართველოს მწვანე ობლიგაციებში ინვესტორი წამყვანი ორგანიზაციის ანგარიშზე და ცხადყოფს ADB-ის ამ და სხვა სასესხო ინსტრუმენტებით წევრი ქვეყნების კლიმატის მიზნების მიღწევაში დახმარების შესაძლებლობას“, —  განაცხადა ADB-ის კერძო სექტორის ოპერაციები დეპარტამენტის ინვესიტიციების უფროსმა სპეციალისტმა დევიდ ურბანეხა-ფურელოსმა.

„ძალიან მოხარული ვარ, რომ GRPO-მ წარმატებით გამოუშვა $80 მილიონის მწვანე ობლიგაცია. ამ ტრანზაქციას ინვესტორებისგან საკმაოდ დიდი დაინტერესება მოჰყვა, რითაც ამ უპრეცედენტო დროშიც კი, კაპიტალზე წვდომის საშუალება მოგვეცა. მადლობელი ვართ, რომ ADB-მ, როგორც ერთ-ერთმა სტრატეგიულმა ინვესტორმა წამყვანი როლი შეასრულა ამ საქმეში,“— აღნიშნა სს „საქართველოს კაპიტალის“ თავმჯდომარემ და აღმასრულებელმა დირექტორმა ირაკლი გილაურმა.

GRPO-ს პორტფელში შედის ხუთი განახლებადი ენერგიის პროექტი, მათ შორის ოთხი ჰიდროელექტროსადგური ჯამური მოცულობით 50.4 მეგავატი, და საქართველოში ერთადერთი ქარის ელექტროსადგური. 2020 წელს ADB-მ ინვესტიცია განახორციელა GRPO-ს წინამორბედი კომპანიის სს „Georgia Global Utilities“-ის გამოშვებულ ობლიგაციებში.

GRPO-ს სრული მფლობელია GRPC ჯგუფი, რომელიც თავის მხრივ სს „საქართველოს კაპიტალის“ საკუთრებას წარმოადგენს. სს „საქართველოს კაპიტალის“ 100%-იანი წლის მფლობელია საზოგადოებრივი სააქციო კომპანია „საქართველოს კაპიტალი“, რომელიც ლონდონის საფონდო ბირჟაზეა აღრიცხული.

LEAP 2016 წელს იაპონიის საერთაშორისო თანამშრომლობის სააგენტოს მიერ $1.5 მილიარდიანი კაპიტალით დაარსებული ფონდია. მისი მიზანია ხელი შეუწყოს მაღალი ხარისხისა და მდგრადი კერძო სექტორის ინფრასტრუქტურის პროექტებს, რომლებიც ამცირებენ ნახშირბადის ემისიას, აუმჯობესებენ ენერგოეფექტურობას და ADB-ის განვითარებად წევრ ქვეყნებში შესაძლებელს ქმნიან ჯანდაცვის, განათლებისა და კომუნიკაციების სერვისებზე წვდომას.

ADB-ის მიზანია, ხელი შეუწყოს აზიისა და წყნარი ოკეანის რეგიონის წარმატებულ, მრავალმხრივ, მედეგ და მდგრად განვითარებას. ამავდროულად, ის აგრძელებს მუშაობას რეგიონში უკიდურესი სიღარიბის აღმოსაფხვრელად. 1966 წელს დაარსებული ორგანიზაცია აერთიანებს 68 ქვეყანას, მათ შორის 49 აზიის რეგიონიდანაა წარმოდგენილი.