ლარის გაუფასურებისა და კორონავირუსის შედეგად გამოწვეული მდგომარეობის გამო , ავტომობილების ფასი ერთ თვეში გაიზრდება, რადგან ბაზარზე არსებული მდგომარეობა გარკვეული პერიოდის შემდეგ აისახება, ამის შესახებ „კომერსანტს“ კავკასიის ავტოიმპორტის დირექტორი გიორგი სურგულაძე ესაუბრა.
„ლარის გაუფასურების გამო ადგილობრივ ბაზარზე ფასი არ შეცვლილა, არც დაკლებულა არც გაზრდილა. ვისაც მანქანის ყიდვა უნდა კაპიტალი დოლარში აქვს შენახული, რაც შეეხება შესყიდვის ადგილებს მაგალითად ამერიკას, იქ ფასი საგრძნობლად დაეცა, იმის გამო, რომ მანქანებზე მოთხოვნაც შემცირებულია. თუმცა, გარკვეული პერიოდის შემდეგ, თუნდაც ერთ თვეში ავტომობილების ფასი მოიმატებს. რადგან ახლა მიმდინარე მოვლენები გარკვეული პერიოდის შემდეგ აისახება ბაზარზე.“-ამბობს გიორგი სურგულაძე.
კავკასიის ავტოიმპორტი დირექტორის თქმით, ავტომობილების იმპორტი ორი ნაწილისგან შედგება ჩამოყვანა და რეალიზაცია და ორივე ნაწილში საქართველო შეუფერხებლად მუშაობს.
„ერთია ავტომობილის ჩამოყვანის პროცესი, პორტების მუშაობა არ მუშაობის საკითხი და მეორეა თავად რეალიზაცია.ჩამოყვანის მიმართულებით შეფერხება არ გვაქვს, აშშ ასეთი ბიზნესი, რომელიც საპორტო გადაზიდვითაა დაკავშირებული გამოცხადდა პრიორიტეტულ ბიზნესად. იგივე მოხდა ფოთის პორტშიც, რომელიც გამართულად მუშაობს, რადგან მნიშვნელოვანი სტრატეგიული ობიექტია. კორიდორი, რომ ავტომობილები შემოვიდეს ქვეყანაში და რეგიონში ღიაა“-აღნიშნა სურგულაძემ.
რაც შეეხება ავტომობილების რეალიზაციას, კორონავირუსის გამო საქართველოში გაყიდვების მაჩვენებელი განახევრდა, რეგიონის სხვა ქვეყნებში კი მათი წილი მხოლოდ 25%-ით შემცირდა.
„რეალიზაცია განახევრდა, თუმცა არ განულებულა, ეს რაც შეეხება საქართველოს. ჩვენ ასევე ვართ უკრაინასა და სხვა მეზობელ ქვეყნებში, ასეთი ვარდნა არ არის, 25-30%-ით იკლო გაყიდვების მაჩვენებელმა.“-აცხადებს გიორგი სურგულაძე.
კავკასიის ავტოიმპორტი დირექტორი ონლაინ გაყიდვებსაც შეეხო და განაცხადა, რომ საქართველოში ონლაინ ვაჭრობაზე არც ადრე ყოფილან დამოკიდებული და არც ამ პერიოდში არიან.
„Myauto.ge-ზე ვიზიტორების რაოდენობა არის გასამმაგებული, თუმცა ეს არ ნიშნავს, რომ გაყიდვები ამ რაოდენობითაა გაზრდილი, ხალხი სახლში ზის და დროის გაყვანის მიზნით ან სამომავლო შენაძენისთვის სტუმრობს საიტს.“ -ამბობს სურგულაძე.
ნათია ლომიძე