დარგობრივი ეკონომიკისა და ეკონომიკური პოლიტიკის კომიტეტმა აზარტული თამაშობების შესახებ კანონპროექტი დაამტკიცა, რომლის მიხედვითაც, ელექტრონული ფორმით სამორინეს, სათამაშო აპარატების, ტოტალიზატორის თამაშობების ორგანიზების სანებართვო საქმიანობების განსახორციელებლად სექტორმა ლიცენზია უნდა მოიპოვოს. იმ შემთხვევაში თუ ბიზნესს კაზინო უკვე აქვს, ონლაინ კაზინოს მოსაწყობად 200 ათასი ლარის გადახდა მოუწევს, მხოლოდ ონლაინ კაზინოს დასარეგისტრირებლად, კომპანიამ 5 მლნ ლარი უნდა გადაიხადოს.
როგორც რადიო „კომერსანტის“ ეთერში სათამაშო ბიზნესის ასოციაციის ხელმძღვანელმა გიორგი მამულაიშვილმა განაცხადა, სოციალური კუთხით ბევრი პრობლემა შეიქმნა და სიტუაცია ძალიან უკონტროლოა. მისი თქმით, სათამაშო ბიზნესი რეგულაციების წინააღმდეგი არ ყოფილა, თუმცა ის ფორმა, რა ფორმითაც კანონი გავიდა, მიუღებელია, რადგან მაღალი გადასახადების დაწესების შემდეგ არალეგალურ საიტებთან არათანაბარ კონკურენტულ გარემოში აღმოჩნდნენ.
„რეგულაციების წინააღმდეგი არ ვყოფილვართ. ის ფორმა, რა ფორმითაც ეს კანონი გავიდა, მიუღებელია. დამატებითი გადასახადის დაწესება ადგილობრივი ოპერატორებისთვის, ნაწილობრივ ხელს შეუწყობს არალეგალური საიტების განვითარებას. პრობლემა ასე დგას: ადგილობრივ ოპერატორს გადასახადებიდან გამომდინარე მარკეტინგული მიმართულების განვითარება უჭირს. უცხოური ოპერატორი, რომელიც არაა რეგისტრირებული საქართველოს ტერიტორიაზე და არ ექვემდებარება საქართველოს კანონმდებლობას, იმ თანხას, რასად ადგილობრივი ოპერატორი გადასახადებში იხდის, რეკლამაზე ხარჯავს. თანაბარ პირობებში რომ აღმოვჩნდეთ, ბიზნესს პრობლემა არ ექნება. ახალი გადასახადი საკმაოდ დიდია. აქ არ არის საუბარი მხოლოდ 5 მლნ-ზე, დამატებითი მოსაკრებელი 250 000-ია“, - აცხადებს გიორგი მამულაიშვილი.
ის თვლის, რომ „მიწის კაზინოზე“ ონლაინ კაზინოს მიბმა არასწორია და აზარტული თამაშის ორ: კაზინოს ნაწილად და სლოტ-აპარატების ნაწილად დაყოფაც გაუგებარია.
„მიწის კაზინოზე“ ონლაინ კაზინოს მიბმა არაა სწორი მიდგომა. ასეთი რამ მსოფლიოს განვითარებულ ქვეყნებში არსად არ არის. პლუს ამას დაირღვა აზარტული თამაშების შესახებ პრინციპი. აზარტული თამაში 2 ნაწილად დაიყო. ეს არის - კაზინოს ნაწილი და სლოტ აპარატების ნაწილი და ესეც გაუგებარია,“ - აცხადებს გიორგი მამულაიშვილი.