დღევანდელი განაჩენი იყო სახის შენარჩუნება ბრალდების მხარისთვის, გამართლება მათთვის ძალიან ცუდი იქნებოდა. თაღლითობის, როგორც დანაშაულის განხილვა სასამართლო სხდომებზე არც მომხდარა, თაღლითობას სჭირდება დაზარალებული, რომელიც ამ საქმეში არ არის, - ასე აფასებს ე.წ. ფულის გათეთრების საქმეზე ბრალდებულების ადვოკატი ზვიად კორძაძე საქალაქო სასამართლოს გადაწყვეტილებას, რომელმაც მამუკა ხაზარაძე, ბადრი ჯაფარიძე და ავთანდილ წერეთელი თაღლითობაში დამნაშავედ ცნო, თუმცა საპატიმრო სასჯელისგან გაათავისუფლა.

ადვოკატის განმარტებით, აღნიშნულ გადაწყვეტილებას სააპელაციო სასამართლოში გაასაჩივრებენ და გამამართლებელი გადაწყვეტილებით დამთავრდება.

„დღეს დადასტურდა ის, რასაც 3 წლის განმავლობაში ვამბობდით, რომ არავითარ ფულის გათეთრებას ადგილი არ აქვს. ეს განაჩენი თავს ვერ დაიკავებს ზემდგომ ინსტანციებში და დამთავრდება გამართლებით, როგორც 3 წლის წინ დავპირდით პროკურატურას, რომ ფულის გათეთრება ვერ დადგებოდა, ასევე ვპირდებით, რომ არც თაღლითობა დადასტურდება. რა თქმა უნდა, ამას გავასაჩივრებთ და როგორც 3 წლის წინ ვამბობდით, რომ არ ყოფილა ფულის გათეთრება, ასევე დადგინდება, რომ არავითარ თაღლითობას ადგილი არ ჰქონია”, - აღნიშნა ზვიად კორძაძემ.

შეგახსენებთ, რომ ბრალდებულები - მამუკა ხაზარაძე, ბადრი ჯაფარიძე და ავთანდილ წერეთელი სასამართლომ დამნაშავედ ცნო, თუმცა, მოსამართლემ სამივე მათგანს მუხლის კვალიფიკაცია შეუცვალა და ისინი ჯგუფურ თაღლითობაში ცნო დამნაშავედ. თითოეულ მათგანს თავისუფლების აღკვეთა შეეფარდათ 7 წლის ვადით, თუმცა, მუხლის ხანდაზმულობის გამო, ისინი დანიშნული სასჯელისგან გათავისუფლდნენ.

ipn.ge