მოლდოვას სეპარატისტულ დნესტრისპირეთში, რომელსაც რუსეთის შეიარაღებული ძალები აკონტროლებენ, ბოლო ორ დღეში ორი გადამცემი ანძა ააფეთქეს, რომლების მეშვეობით, გავრცელებული ინფორმაციით, რუსული რადიოსადგურები ტრანსლირებდნენ. მომხდარს რუსეთის დუმის დსთ–ის საკითხთა კომიტეტის თავმჯდომარემ ლეონიდ კალაშნიკოვმა პროვოკაცია უწოდა, რომლის მიზანი, მისივე თქმით, ამ რეგიონში რუსეთის საომარ მოქმედებებში ჩათრევაა.
მიიღე ინფორმაცია უფრო სწრაფად „კომერსანტის“ Telegram-ზე.
ამასობაში, ვრცელდება ინფორმაცია, რომ მოლდოვას პრეზიდენტმა მაია სანდუმ უშიშროების საბჭო საგანგებო სხდომაზე მოიწვია. საბჭო დღეს, 26 მაისს, 13:00 საათზე შეიკრიბება, ხოლო 15:00 საათზე პრეზიდენტი ბრიფინგს გამართავს.
მოლდოვას ინფორმაციისა და უსაფრთხოების სამსახურმა კი მოსახლეობას სიმშვიდისკენ მოუწოდა.
„საზოგადოებას სიმშვიდისკენ მოვუწოდებთ და ვთხოვთ, თავი შეიკავონ არასანდო წყაროების, განსაკუთრებით ზიზღისა და ომის ხელშემწყობი ინფორმაციის გავრცელებისგან“, – ნათქვამია უწყების განცხადებაში.
გუშინ, 25 აპრილს, დნესტრისპირეთის უშიშროების სამსახურის შენობასთან აფეთქება მოხდა, შენობას ხელის ყუმბარმტყორცნებიდანაც გაუხსნეს ცეცხლი. დღეს კიდევ ორი აფეთქება მოხდა დნესტრისპირეთის სოფელ მაიაკში, რომლის შედეგად კავშირგაბმულობის ორი ანძა დაზიანდა. ორივე ობიექტი რუსული რადიოების რეტრანსლირებას ახორციელებდნენ. დაშავებულთა შესახებ ინფორმაცია არ ვრცელდება.
რუსეთში არაერთხელ განაცხადეს, რომ მათ მიზანს უკრაინის სამხრეთის ოკუპაცია წარმოადგენს, რათა სახმელეთო წვდომა ჰქონდეთ ყირიმის ნახევარკუნძულზე და დნესტრისპირეთში, სადაც, კრემლის მტკიცებით, რუსულენოვანი მოქალაქეების უფლებები ირღვევა.
მანამდე, 26 აპრილს დილით, რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა, რომ დასავლეთსა და რუსეთს შორის ურთიერთობები ჩიხში შედის და ეს ჩიხი სულ ახლოსაა.