„ქვეყანაში გვაქვს ძალიან ბევრი აფთიაქი, იმაზე დაახლოებით 3-ჯერ მეტი, ვიდრე ქვეყანას სჭირდება,“ - ამის შესახებ საქართველოს ჯანდაცვის მინისტრმა  პარლამენტში, ჯანდაცვის კომიტეტზე  რეფერენტული ფასების შემოღების შემდეგ წამლებზე შესაძლო დეფიციტზე საუბრისას განაცხადა.

„კომერსანტი“ დაინტერესდა, მართლაც საჭიროზე მეტი აფთიაქი ფუნქციონირებს თუ არა დღეს ქვეყანაში და როგორია ამ მიმართულებით მოთხოვნა-მიწოდების ჯაჭვი

საქართველოს ფარმაცევტთა ასოციაციის პრეზიდენტი ლევან გოგიბერიძე „კომერსანტთან“ აცხადებს, რომ აფთიაქების რაოდენობას მათზე მოთხოვნა განაპირობებს.

„არ ვიცი, მინისტრმა რასთან მიმართებაში თქვა, რომ ქვეყანაში 3-ჯერ მეტი აფთიაქი არსებობს, მოსახლეობის რაოდენობასთან? ტერიტორიის მოცვასთან? იმიტომ, რომ ნებისმიერი აფთიაქი იქნება ეს, თუ სურსათის მაღაზია, უკაცრავად ასეთი შედარებისთვის, მაგრამ იხსნება მოსახლეობის მოთხოვნილების დასაკმაყოფილებლად. ანუ აფთიაქების რაოდენობას განაპირობებს მოთხოვნა, რომელიც მოსახლეობას აქვს, ამ შემთხვევაში მედიკამენტების მიმართ. აქედან გამომდინარე, აფთიაქი დოტაციაზე არ არის და მუშაობს მოთხოვნილების შესაბამისად და აქედან გამომდინარე, არის ის რაოდენობა, რა რაოდენობაც ესაჭიროება ჩვენს მოსახლეობას ამ ეტაპისთვის.

რაოდენობა იდეა-ფიქსი ხომ არაა? რომ ვიღაცამ გადაეწყვიტა რომ უნდა ყოფილიყო 100 და რატომაა ახლა 300. რადგან არის 300, სამასივე აუცილებელია და საჭიროებიდან გამომდინარეობს, ხომ? როცა არ უნდა შეხვიდე აფთიაქში, არის რიგი. ანუ არის მოთხოვნა. ახლა სამჯერ მეტი იქნება ეს, თუ 5-ჯერ მეტი, N ციფრიდან გამომდინარე, მაგას არ აქვს არსებითი მნიშვნელობა. მთავარი არის, რომ აფთიაქები მუშაობენ საჭიროებიდან გამომდინარე.

შესაძლებელია ევროპასთან შედარებით, მოსახლეობიდან გამომდინარე, ტერიტორიული ფაქტორებიდან გამომდინარე იყოს მეტი, მაგრამ არის მეტი იმიტომ, რომ ეს სჭირდება მოსახლეობას,“ - აცხადებს საქართველოს ფარმაცევტთა ასოციაციის პრეზიდენტი ლევან გოგიბერიძე.

შეგახსენებთ, აფთიაქების გადაჭარბებულ რაოდენობაზე განცხადება ჯანდაცვის მინისტრმა გააკეთა. მისი თქმით,  პრობლემები შეიძლება ხელოვნურად იქმნებოდეს აფთიაქების გაფანტულობის გამო.