ოკუპირებულ აფხაზეთში ტურიზმის სეზონი აქტიურდება. ამ მხრივ დიდი გავლენა მოახდინა რუსეთის მიმართ დაწესებულმა სანქციებმა, ოკუპირებულ რეგიონში რუს ტურისტებს ელოდებიან. რუსული ტურისტული კომპანიები აქტიურად მოუწოდებენ მოსახლეობას, დაისვენონ აფხაზეთში. ისინი დასვენების გაძვირების შესახებ წინასწარ გააფრთხილეს.
კერძოდ, როგორც რუსული მედია ადგილობრივ ტუროპერატორებზე დაყრდნობით წერს, აფხაზეთში დასვენება გასულ წელთან შედარებით 20-30%-ით ძვირდება.
ტურისტული სერვისების გაძვირებაზე უკვე განაცხადა აფხაზეთის ე.წ. ტურიზმის სამინისტროს ხელმძღვანელმა თეიმურაზ ხიშბამ, რომლის ინფორმაციითაც, და სასტუმროების აღჭურვილობის, ექსპლუატაციისა და მატერიალურ-ტექნიკური ბაზის უზრუნველსაყოფად საჭირო საქონლის უმეტესი ნაწილი რუსეთიდან მიეწოდება.
„2022 წლის ზაფხულში შესაძლოა აფხაზეთში დასვენება გაძვირდეს. ეს გამოწვეულია გლობალური ეკონომიკის უახლესი მოვლენებით. კერძოდ, ევროკავშირის ქვეყნების სანქციებით რუსეთის წინააღმდეგ. ჩვენს ტუროპერატორებს შორის ჩატარებული ანალიზის მიხედვით, ბაზრებზე ფასები საშუალოდ შეიძლება გაიზარდოს 20-30 პროცენტით.აფხაზურ მიმართულებაზე მოთხოვნა ამჟამად კოვიდამდელ პერიოდს უახლოვდება“ - განაცხადა მან.
ხიშბას თქმით, ივნისში All Inclusive სისტემით სასტუმროებში შვიდი ღამის განმავლობაში ერთ ადამიანზე ცხოვრების სავარაუდო ღირებულებაა 15-დან 30 ათას რუბლამდე, ივლისსა და აგვისტოში ეს იქნება 30-დან 50 ათას რუბლამდე. ხავერდოვანი სეზონზე კი დასვენების საფასური 25 ათასი რუბლიდან იქნება.
ძვირდება ასევე აფხაზეთის კერძო სექტორში განთავსების ტარიფიც.
,,ოროთახიანი ბინის დაქირავება 1,5 ათასი რუბლი (75 ლარი) ეღირება. საცხოვრებლის ღირებულება დამოკიდებულია პირობებზე, ზღვასთან სიახლოვეზე, სეზონზე. მაღალ სეზონზე შეთავაზებები გაცილებით ძვირია, - ამბობს ხიშბა.
მან ასევე განაცხადა, რომ 2019 წლიდან აფხაზეთში განსახლების ობიექტების რაოდენობა 60%-ით, ხოლო სასტუმროებში საწოლების რაოდენობა 44%-ით გაიზარდა.
აფხაზეთში ტურისტების გააქტიურებაზე საუბრობს ,,კომერსანტთან“ აფხაზეთის ექსპერტთა კლუბის წარმომადგენელი ირაკლი ცქიტიშვილი. მისი თქმით, იქაურობა ექსტრემალური ტურების მოყვარულთათვის არის საინტერესო ველური ბუნებით, რითაც წლების განმავლობაში მეტნაკლებად იზიდავს აფხაზეთი დამსვენებლებს.
,,აფხაზეთის ტურიზმს წელს მეტი შანსი აქვთ, რომ შექმნილი სიტუაციით ისარგებლონ და მოიზიდონ რუსი დამსვენებლები. ევროპაში ვერ დაისვენებენ, ამიტომ დიდი ნაწილი აფხაზეთს მიაშურებს. როცა კრიმინალი რომ ყვაოდა, მაშინაც ჩადიოდნენ იქ რუსები, ახლა არაფერი შეუშლის ხელს. ექსტრემალური ადგილები ვისაც იზიდავს, ამ მხრივ ეს ტერიტორიები საინტერესოა. ამდენად, ბუნებრივია, რომ ბევრ ტურისტს ელოდებიან. იმ პირობებში, როცა რუსეთისთვის ყველაფერი დაკეტილია, ერთ-ერთ ყველაზე პერსპექტიულ მიმართულებად აფხაზეთი რჩება. ბევრს იზიდავს მიტოვებული ადგილების ნახვა, ველური ბუნება, როგორიც სოხუმში, გაგრასა და ოჩამჩირეშია. ამ მხრივ გალი ნაკლებად საინტერესოა“, - ამბობს ირაკლი ცქიტიშვილი.
აფხაზური მხარის ცნობით, 2021 წელს აფხაზეთში 1,5 მილიონზე მეტმა ადამიანმა დაისვენა, რითაც ბოლო 30 წლის რეკორდი მოხსნა.
რუსეთ–საქართველოს 2008 წლის აგვისტოს ომის შედეგად კრემლმა აფხაზეთისა და ცხინვალის რეგიონის ოკუპაცია მოახდინა. რუსეთის შეიარაღებული ძალები დღემდე აკონტროლებენ საქართველოს ამ ორ რეგიონს.
მარი ჩიტაია