შაქრის გადამმუშავებელი კომპანია „აგარის შაქარი“ ფუნქციონირებას 15 აპრილიდან სახელმწიფოს ხელშეწყობით გაახლებს, - ამის შესახებ კომპანიის დირექტორთა საბჭოს წევრმა ნიკოლოზ ნათბილაძემ BM.GE-ის განუცხადა.
მისივე ცნობით, ქარხნის სამუშაო გეგმა 2023 წლის 31 დეკემბრამდეა გაწერილი.
„საქართველოში ერთადერთი შაქრის გადამმუშავებელი აგარის ქარხანა, წინა წლების მსგავსად წელსაც სახელმწიფოს ხელშეწყობით, კერძოდ ენერგორესურსებზე და სატრანსპორტო გადაზიდვაზე მიიღებს შეღავათიან ტარიფებს, რაც ქვეყანას შესაძლებლობას მისცემს, რომ ადგილობრივი ბაზარი პირველადი მოხმარების პროდუქტით კონკურენტუნარიანი იყოს, რაც ქვეყნის სასურსათო უსაფრთხოებისთვის უმნიშვნელოვანესია.
რუსეთ-უკრაინის ომმა განაპირობა, რომ შაქრის ექსპორტიორი ქვეყნები, ადგილობრივი ბაზრის დაცვას და კვოტებით ექსპორტირებას ახდენენ. შესაბამისად ჩვენ ქვეყანაში აგარა ერთადერთი შაქრის მწარმოებელი ქარხანაა და სახელმწიფოს მხრიდან ხელშეწყობის მიზანიც სასურსათო უსაფრთხოებაა. ამჟამად ქარხანას საკმარისი მარაგები გააჩნია და შაქრის დეფიციტის საშიშროება ქვეყანაში არაა“, - განაცხადა ნიკოლოზ ნათბილაძემ.
BM.GE