,,აგარის შაქარი“ გაზაფხულამდე ფუნქციონირებას შეაჩერებს და კონსერვაციის რეჟიმში გადავა.

ქარხნის დირექტორი, ნიკოლოზ ნათბილაძე ,,ბიზნესპრესნიუსთან“ განმარტავს, რომ ეს სამუშაო სპეციფიკის ნაწილია. ასე ხდება ყოველ წელს და დასაქმებულებთანაც ხელშეკრულებები ამ სპეციფიკის გათვალისწინებით იდება.

,,ყველასთვის ცნობილია, რომ აგარის ქარხანა ბოლო წლებია მთავრობის ხელშეწყობით პირველადი მოხმარების პროდუქტის გამომუშავებაზე და ქვეყანაში სასურსათო უსაფრთხოების შექმნაზე ზრუნავს. 2021 წელს 1-ელ მარტს, სამთვიანი გაჩერების შედეგ, ქარხანა მუშა რეჟიმზე გადავიდა და 63 500 ტონა გადაამუშავა. 31 დეკემბრამდე ქარხანა იმუშავებს, შემდეგ გადავა კონსერვაციის რეჟიმში და პირველი მარტისთვის განახლდება სარემონტო სამუშაოები, საწარმოო პროცესი კი პირველი აპრილიდან აღდგება.

სამომავლოდ, ანუ 2022 წელს ისევ ამ რეჟიმში 31 დეკემბრამდე იმუშავებს. ზუსტად რომ განვმარტო, ასეთია ამ საწარმოს ფუნქციონირების სპეციფიკა - ქარხანა 10 თვე მუშაობს და წლის ბოლოს კონსერვაცია ხდება, ასეთია ტერმინი. შესაბამისად, რადგან სამუშაო ერთგვარად სეზონურია, ასეთივე ხელშეკრულებას ვდებთ დასაქმებულებთან და ჩვენი 500-მდე თანამშრომელი კვლავ განაგრძობს თავის სამუშაოს გაზაფხულიდან, კვლავ მთავრობის მხარდაჭერით.

ხაზგასმით აღვნიშნავ, სამუშაო სპეციფიკა ყოველი წლის ბოლოს ითვალისწინებს კონსერვაციის რეჟიმს და ეს არ უნდა იყოს გაგებული, როგორც დახურვა“, - განაცხადა ნიკოლოზ ნათბილაძემ ,,ბიზნესპრესნიუსთან“.

bpn.ge