თითქმის ერთი თვეა გერმანიაში, ფრანკფურტსა და დარმშტატს შორის, ერთ-ერთ ბენზინგასამართ სადგურთან ათობით ტრაილერი დგას. ქართველი, უზბეკი და ფილიპინელი მძღოლები მარტის ბოლოს  გაიფიცნენ. ისინი დამსაქმებელს, პოლონურ გადამზიდავ კომპანიას  ხელფასებს  სთხოვენ  და არაადამიანურ მოპყრობაში ადანაშაულებენ.

მძღოლებს მხარს საქართველოს გაერთიანებული პროფკავშირები უჭერს, დახმარების წერილები გაგზავნილია გერმანიისა და პოლონეთის მთავრობების სახელზე. შუაგულ ჰესენში გაჩერებული 80-მდე ტრაილერის მძღოლების ისტორიას აქტიურად აშუქებს გერმანული მედია.

გაფიცულებთან დღეს, 13 აპრილს გერმანიის ბუნდესტაგის წევრებიც მივიდნენ.

“სიტუაცია არის მძიმე, ადამიანებს ძალიან დიდი ხანია არ აუღიათ ხელფასი და როგორც ჩანს, ეს პოლონელი დამსაქმებლის დამკვიდრებული პრაქტიკაა, რომ მეოთხე, მეხუთე თვიდან იწყებს ხელფასების გაცემას და გაფიცვის დღეებში საერთოდ არც კი განიხილავს ანაზღაურების საკითხს. გაფიცვა გერმანიაში და ევროპაში არავის უკვირს, მაგრამ ამ შემთხვევამ გერმანელები განსაკუთრებით იმის გამო აღაშფოთა რომ გაფიცულები უკეთეს ანაზღაურებას ან პირობებს კი არ ითხოვენ, არამედ უკვე ნამუშევარი ხელფასის აღებას” - უთხრა რადიო თავისუფლებას საქართველოს პროფკავშირების გაერთიანების თავმჯდომარემ, ირაკლი პეტრიაშვილმა. ის გერმანიაში 12 აპრილს ჩავიდა. მისი ორგანიზაცია ევროპელ პარტნიორებთან ერთად გაფიცვის დაწყებიდან ჩართულია მძღოლების ინტერესების დაცვაში. ამ ეტაპზე მხარეებს შორის მომლაპარაკებლად ჰოლანდიური პროფკავშირების წარმომადგენელია ჩართული და ითხოვს მორიგებამდე გაფიცული თანამშრომლებისთვის სახელფასო დავალიანების სრულად ანაზღაურებას. 

თუკი პროფკავშირების მცდელობა მორიგებაზე უშედეგოდ დასრულდება, საქმის განხილვა, სავარაუდოდ, სასამართლოში გადაინაცვლებს.

“ყოველ დღე ჩერდებიან აქ ევროპელი ტრაილერის მძღოლები, რომლებსაც გაფიცულებთან მოაქვთ სიგარეტი, საკვები… სოლიდარობა იმდენად დიდია, იმის გამო, რომ ამ სფეროში დასაქმებული ყველა ხვდება რომ საუბარია არა მხოლოდ 70 გაფიცული მძღოლის პრობლემაზე, არამედ ამ ინდუსტრიის სისტემურ პრობლემაზე. ეს ინდუსტრია უნდა შეიცვალოს და ეს მხოლოდ ბრძოლითაა შესაძლებელი, რასაც აკეთებენ კიდეც გაფიცული მძღოლები” - უთხრა ევროპის ტრანსპორტის ფედერაციის წარმომადგენელმა, ედვინ ათემმა გერმანულ ტელეარხ SAT1-ს 11 აპრილს, ტრაილერის მძღოლების პროტესტზე საუბრისას.

“ასეთი პრობლემების წინაშე ბევრი სხვა მძღოლიც დგას. ეს ინდუსტრია სავსეა კომპანიებით, რომელიც მსგავსად დასაქმებულებს. ეს შემთხვევას შეიძლება ჰქონდეს ზვავის ეფექტი ინდუსტრიისთვის” - უთხრა ათემმა რადიო თავისუფლებას 13 აპრილს.

სოლიდარობას გრძნობენ თავად გაფიცულები. გერმანიის მოქალაქეების ყოველდღიურად გაწეული დახმარებასთან ერთად, ქართველი მძღოლების გაოცებას იწვევს ადგილობრივი ხელისუფლების ჩართულობა და მათი პრობლემებით დაინტერესება.

აღნიშნულ თემას რადიო თავისუფლება ვრცელ სტატიას უძღვნის.