4 მარტს, ქონების მართვის სააგენტოს მიერ უკვე მეოთხედ გამოცხადებულ აუქციონზე, თბილისში, აღმაშენებელზე მდებარე წმინდა მიხეილის სახელობის საავადმყოფოს შენობა 16 მილიონ ლარად გაიყიდა. ობიექტის მყიდველია შპს „ჰანსა“, რომელსაც რუსეთში მოღვაწე ქართველი ბიზნესმენი შალვა ბრეუსი ფლობს. აუქციონზე მყიდველს პრეტენდენტები არ ჰყოლია, რადგან პროექტი იმთავითვე ითვალისწინებდა ობიექტის კულტურულ დანიშნულებას და ბიზნესმენებისთვის კომერციულად არ აღმოჩნდა საინტერესო.
ინვესტორი ობიექტის ტერიტორიაზე თანამედროვე ხელოვნების მუზეუმის აშენებას აპირებს. საუბარია არა მხოლოდ მუზეუმზე კლასიკური გაგებით, არამედ კულტურის ახალ თანამედროვე კერაზე, რომელიც აღჭურვილი იქნება საგანმანათლებლო, სამეცნიერო, საბიბლიოთეკო, საგამომცემლო, საგამოფენო და დასასვენებელი ფუნქციებით, რისთვისაც 5 წელიწადში არანაკლებ 30 მლნ
ლარის ინვესტიცია განხორციელდება.
გერლენების პრემიის ცერემონიალზე, ჟიურის წევრები შალვა ბრეუსი და პომპიდუს მუზეუმის დირექტორი ბერნარ ბლისტენი.
შალვა ბრეუსი მსოფლიოს თანამედროვე ხელოვნების მოყვარულთა შორის ცნობილია, როგორც თანამედროვე ხელოვნების ექსპერტი, არაერთი საერთაშორისო კონკურსის, მათ შორის , მარსელ დუშანის პრემიისა და გერლენების მხატვრობისა და გრაფიკის პრემიების ჟიურის წევრი, გამომცემელი, კოლექციონერი და ფილანტროპი. საქვეყნოდ აღიარებულია თანამედროვე მხატვრობის მისი კოლექციაც, რომლის ბირთვს გერმანელი ექსპრესიონისტების ნამუშევრები წარმოადგენენ. კოლექცია მდიდარია თანამედროვე ქართული მხატვრობის ნიმუშებითაც. შალვა ბრეუსს დაფუძნებული აქვს საკუთარი სახელობის საერთაშორისო ფონდი, რომლის
მიერ დაარსებული კანდინსკის პრემია ბრიტანული ტერნერის (Turner Prize) და ფრანგულ მარშელ დუშანის (Marcel Duchamps Prize) ჯილდოებთან ერთად თანამედროვე ხელოვნების მსოფლიოს 3 წამყვან პრემიას წარმოადგენს.
ბიზნესმენი დიდი ხანია თანამედროვე ხელოვნების მუზეუმის უნიკალურ პროექტზე მსოფლიოს წამყვან სპეციალისტებთან ერთად მუშაობს. ასევე წლებია მიმდინარეობს მუზეუმისთვის ადგილის შერჩევა. განიხილებოდა ვენეციის, მოსკოვის, ბრიუსელის და თბილისის არქიტექტურულად საინტერესო ადგილები და ძეგლები, მაგრამ ბრეუსმა არჩევანი თბილისზე გააკეთა.
„მე დავიბადე და გავიზარდე საქართველოში, მიყვარს საქართველო, მიყვარს ხელოვნება და ამ ორი ვექტორის გადაკვეთის ემოციამ გადამაწყვეტინა პროექტი თბილისში განმეხორციელებინა“, - აღნიშნა შალვა ბრეუსმა.
შალვა ბრეუსს საქართველოში არაერთი საქველმოქმედო პროექტი აქვს განხორციელებული, რომელთა შორის აღსანიშნავია ნეველის სახელობის ეკლესიის რესტავრაცია აბასთუმანში და ნესტეროვის მიერ დაწერილი უნიკალური ფრესკების გადარჩენა; ბათუმში, სამების მთაზე წმინდა სამების საეკლესიო კომპლექსის აშენება, რომელიც უკვე იქცა ქალაქის სავიზიტო ბარათად და რომლის გამოც იგი საქართველოს კათოლიკოს პატრიარქმა უმაღლესი საეკლესიო ორდენით, წმინდა გიორგის ჯვრით დააჯილდოვა. მის სახელს უკავშირდება ასევე საქართველოში საეკლესიო მოზაიკის დაკარგული ტრადიციის აღდგენა.
გამომდინარე იქიდან, რომ ხელოვნების მუზეუმი არ შეიძლება იყოს მომგებიანი, იგი არის არის წმინდა სოციალური და კულტურული ტვირთის მატარებელი პროექტი, რომელიც ითვალისწინებს საგანმანათლებლო, სამეცნიერო, საბიბლიოთეკო, საგამომცემლო, საგამოფენო და დასასვენებელი სექციების ერთიან სისტემაში ამუშავებას რეალიზებას. პროექტი ითვალიწინებს შენარჩუნებულ იქნეს მიხაილოვის საავადმყოფოს ისტორიული ძეგლის იერსახე და ისტორიული პარკის მწვანე საფარი. პროექტის ავტორი ამ სირთულის გადაჭრას კონკურსში მსოფლიოს წამყვანი არქიტექტორების ჩართვით აპირებს. ამ მიზნით, კონკურსი უკვე
გამოცხადებულია და ივლისში საქართველოს მსოფლიოს ყველაზე ავტორიტეტული და საუკეთესო არქიტექტორების ჯგუფი ეწვევა, რომლებიც ადგილზე გაეცნობიან ობიექტს და დაიწყებენ თანამედროვე ხელოვნების მუზეუმის არქიტექტურაზე მუშაობას. შენობაც უნდა იყოს ხელოვნების ნიმუში, თვლის პროექტის იდეის ავტორი შალვა ბრეუსი.