ევროკავშირი საქართველოს დახმარების სახით 3 ,9 მლრდ ევროს გამოყოფს. აღნიშნულ თანხას ქვეყანა ევროკავშირის აღმოსავლეთ პარტნიორობის პროგრამის ფარგლებში მიიღებს. ამის შესახებ ევროპული სამეზობლო პოლიტიკისა და გაფართოების საკითხებში ევროკომისარმა ოლივერ ვაჰრეიმ, რომელიც თბილისში ოფიციალური ვიზიტით იმყოფება, პრემიერ–მინისტრ ირაკლი ღარიბაშვილთან ერთობლივ პრეს–კონფერენციაზე განაცხადა.
ევროკომისარსა და პრემიერს შორის მოლაპარაკებები როგორც პირისპირ, ისე გაფართოებულ ფორმატში გაიმართა.
საქართველოს პრემიერ–მინისტრი მადლობას უხდის ევროკომისარს საქართველოსთვის გაღებული „ხელშესახები სიკეთის“ გამო.
„საქართველოს მთავრობისა და ქართველი ხალხის სახელით კიდევ ერთხელ გულრწფელ მადლობას ვუხდი ევროკომისარს ოლივერ ვარჰეის 3,9 მილიარდი ევროს დახმარების პაკეტისთვის.
ეს არის კონკრეტული, ხელშესახები სიკეთე, რაც ევროკავშირისგან შეიძლება მიიღოს ჩვენმა ქვეყანამ და ხალხმა.
მზად ვართ, უკვე ორშაბათიდან აქტიურად დავიწყოთ მუშაობა პაკეტით გათვალისწინებულ პროექტებზე, როგორიც არის დაკავშირებადობის, სატრანსპორტო, ენერგეტიკული, მცირე და საშუალო ბიზნესის, სოფლის მეურნეობის განვითარების და ჩვენი ქვეყნის ეკონომიკის აღორძინების მიმართულებით, რაც საბოლოო ჯამში, მოიტანს მეტ კეთილდღეობას ჩვენი მოსახლეობისთვის, მეტ განვითარებას და ჩვენი ქვეყნის გაძლიერებას“, – წერს ირაკლი ღარიბაშვილი ფეისბექის ოფიციალურ გვერდზე.
საქართველოს პრემიერ–მინისტრის პრეს–სამსახურის ცნობით, შეხვედრაზე იმსჯელეს აღმოსავლეთ პარტნიორობის 2020 წლის შემდგომი დღის წესრიგის მნიშვნელოვან პრიორიტეტებზე. ხაზი გაესვა შავი ზღვის პოტენციალის სრულად შესწავლისა და ამ მიმართულებით შემდგომი ნაბიჯების გადადგმის მნიშვნელობას.
აღინიშნა, რომ საქართველოს მიზანია, ღრმა და ყოვლისმომცველი თავისუფალი სავაჭრო სივრცის შეთანხმების განხორციელებით, ევროკავშირის ერთიან ბაზარზე ეტაპობრივი ინტეგრაცია და მთავრობა ამ მიმართულებით ძალისხმევას არ იშურებს.
ირაკლი ღარიბაშვილმა აღნიშნა, რომ საქართველოს მთავრობის ამოცანაა, რაც შეიძლება მეტმა ქართველმა მეწარმემ შეძლოს ადგილზე წარმოებული ქართული პროდუქციის გატანა ევროკავშირის ბაზარზე. მხარეებმა ისაუბრეს საქართველოს ოკუპირებულ ტერიტორიებზე შექმნილ მძიმე მდგომარეობაზე. პრემიერ-მინისტრმა ხაზი გაუსვა ზაზა გახელაძის, ირაკლი ბებუას და უკანონოდ დაკავებული საქართველოს ყველა მოქალაქის დაუყოვნებლივ გათავისუფლების აუცილებლობას და ამ პროცესში საერთაშორისო პარტნიორების ძალისხმევის მნიშვნელობას.
ევროკომისარმა ვარჰეიმ საქართველოს სუვერენიტეტისა და ტერიტორიული მთლიანობისადმი ევროკავშირის ურყევი მხარდაჭერა დაადასტურა.
პრემიერმა განსაკუთრებით აღნიშნა ევროკავშირის როლი რუსეთ-საქართველოს კონფლიქტის მშვიდობიანი მოგვარების პროცესში, მათ შორის ჟენევის საერთაშორისო დისკუსიების თანათავმჯდომარეობის გზით.
მთავრობის ადმინისტრაციაში გამართულ შეხვედრას ევროკავშირის ელჩი საქართველოში კარლ ჰარცელი, ვიცე-პრემიერი, საგარეო საქმეთა მინისტრი დავით ზალკალიანი და ევროკავშირში საქართველოს წარმომადგენელი, საქართველოს საგანგებო და სრულუფლებიანი ელჩი ბელგიის სამეფოსა და ლუქსემბურგის დიდ საჰერცოგოში, ვახტანგ მახარობლიშვილი ესწრებოდნენ.